राजविराज रंगशाला नजिक लागुऔषध डेनमा प्रहरीको छापा, एक पक्राउ

राजविराज । राजविराज नगरपालिका- ७ स्थित रंगशाला नजिकै लागुऔषध कारोबार गर्दै आएका एक व्यक्तिलाई प्रहरीले ठूलो परिणाममा लागुऔषधसहित पक्राउ गरेको छ ।

बिशेष सूचनाका आधारमा जिल्ला प्रहरी कार्यालय सप्तरीबाट खटिएको प्रहरी टोलीले राज रंगशालाको पूर्वपट्टि दर्शकहरू बस्न बनाइएको भर्याङको पूर्वतर्फ जस्ताले छाएको टहरामा बसोबास गर्ने ५३ वर्षीय कान्छा दाईले परिचित नारायण बहादुर कार्कीको घरमा खानतलासी गर्दा विभिन्न प्रकारका लागुऔषधहरू बरामद गरेको हो ।

प्रहरीका अनुसार कार्कीको घरमा गरिएको खानतलासीमा क्याट लेखिएको झोलामा तथा बिछ्यौनाको तल लुकाईछिपाई राखिएको अवस्थामा स्पास्मो प्रोक्सिभन प्लस क्याप्सुल-३८२ वटा, नाईट्राजेपाम ट्याब्लेट्स आइ.पी- १४९ वटा, नाईट्राभेट-10 – १५४ वटा, बरामद गरिएको छ । त्यस्तै, लागुऔषध गाँजा जस्तो देखिने ७९ पिस पुरिया, जम्मा ३११ ग्राम पनि फेला परेको प्रहरीले जनाएको छ ।

बरामद लागुऔषधसँगै विभिन्न कपडामा राखिएको नेपाली २ लाख ५० हजार ५ सय १० रूपैयाँ नगद र भारतीय रूपैयाँ ६ हजार ३ सच ३० रूपैयाँ पनि फेला परेको छ । साथै विभिन्न कम्पनीका १३ थान मोबाइल फोन समेत प्रहरीले नियन्त्रणमा लिएको छ ।

पक्राउ परेका नारायण बहादुर कार्कीमाथि लागुऔषध सम्बन्धी मुद्दामा जिल्ला अदालत सप्तरीबाट म्याद थप गराई अनुसन्धान अघि बढाइएको जिल्ला प्रहरी कार्यालय सप्तरीले जनाएको छ ।