सप्तरीमा ट्याङ्करबाट पानी पुर्याउँदै सरकार, संकट समाधानमा स्थानीयको राहत महसुस

राजविराज । लामो समयदेखि परेको खडेरी र वर्षा अभावका कारण खानेपानी संकटको सामना गरिरहेका सप्तरी जिल्लाका विभिन्न बस्तीमा अब दमकल र ट्याङ्करमार्फत आपत्कालीन रुपमा पानी वितरण सुरु गरिएको छ ।

माननीय मुख्यमन्त्री सतिश कुमार सिंहको निर्देशनपछि प्रदेश सरकारले उक्त राहत व्यवस्था अघि सारेको हो ।

मुख्यमन्त्रीको निर्देशन पश्चात प्रदेश सरकारको पहलमा, जिल्ला प्रशासन कार्यालय सप्तरीका प्रमुख जिल्ला अधिकारी भोला दहालको समन्वय, नेपाली सेनाको प्राविधिक सहयोग, र प्रभावित स्थानीय पालिकाको मागका आधारमा खानेपानी आपूर्ति सुरु गरिएको हो ।

आज रुपनी गाउँपालिका १ र २ मा ट्याङ्करमार्फत पानी वितरण सुरु भइसकेको छ भने, राजगढ़ गाउँपालिका, अग्नीसाइर कृष्णासवरन गाउँपालिका, विष्णुपुर गाउँपालिका र सुरुङ्गा नगरपालिकाका विभिन्न वस्तीहरूमा समेत आपूर्ति विस्तार गरिएको छ ।

खानेपानी वितरणको लागि स्थानीय तहसँग समन्वय गरेर सम्पर्क व्यक्ति तोकिएको छ जसले आवश्यक सूचनाको आदानप्रदान र वितरण व्यवस्थापनमा सहयोग गरिरहेका छन् । प्रदेश सरकारद्वारा दमकल र ट्याङ्करको व्यवस्थापनसहित त्यसमा लाग्ने सम्पूर्ण खर्च समेत व्यहोर्ने व्यवस्था गरिएको जनाइएको छ ।

स्थानीयवासीले राहत महसुस गरिरहेका छन् भने, प्रदेश सरकारको सक्रियता र समन्वयकारी प्रयासलाई सराहना गरिरहेका छन् । जलवायु परिवर्तनको प्रत्यक्ष असरस्वरूप देखिएको यो समस्या तत्काल समाधान गर्न प्रदेश सरकारद्वारा गरिएको पहल भविष्यमा दीर्घकालीन समाधान खोज्न थप उत्प्रेरक हुने अपेक्षा गरिएको छ ।