मधेशमा खडेरी पीडितका लागि ६० दिने आपतकालीन राहत कार्यक्रम सुरु

जनकपुरघाम । खडेरीको गम्भीर प्रभाव झेलेको मधेश प्रदेशमा सरकारद्वारा ६० दिने आपतकालीन राहत कार्यक्रम सुरु गरिएको छ ।

राहत कार्यक्रम राष्ट्रिय विपद् जोखिम न्यूनीकरण तथा व्यवस्थापन प्राधिकरणको समन्वयमा, बेलायत सरकारअन्तर्गत सञ्चालित ‘स्टार्ट फन्ड नेपाल’ परियोजनाको कार्यान्वयनमा अगाडि बढाइएको हो ।

यस कार्यक्रमअन्तर्गत पर्सा, बारा, रौतहट, सर्लाही, सिराहा र सप्तरी जिल्लाका १० वटा स्थानीय तह समेटिएका छन् । कार्यक्रम आगामी ६० दिनसम्म सञ्चालन हुनेछ ।

कार्यक्रम तीन चरणमा सञ्चालन हुनेछ । पहिलो चरणमा खडेरीग्रस्त क्षेत्रमा आपतकालीन रुपमा खानेपानी वितरण गरिनेछ । दोस्रो चरणमा गहिरो बोरहोल खन्ने सम्भाव्यता अध्ययन, सिँचाइ प्रणाली सुधार र दीगो पानी आपूर्ति प्रणाली निर्माण गरिनेछ । तेस्रो चरणमा कृषकहरूका लागि ‘क्यास फर वर्क’, सिँचाइ मर्मत र वैकल्पिक बाली प्रवर्द्धनमा प्राविधिक सहयोग प्रदान गरिनेछ ।

प्राधिकरणका अनुसार राहत कार्यक्रममार्फत ८ हजार ३ सय ५५ घरधुरी करिब ४४ हजारभन्दा बढी नागरिकहरू प्रत्यक्ष रूपमा लाभान्वित हुनेछन् । यस प्रयोजनका लागि कुल रु. २ करोड ६० लाख ३३ हजार ४ सय ७६ बजेट विनियोजन गरिएको छ ।

खडेरीका कारण बाली सुक्ने, खानेपानी अभाव, पशुचौपायामा असरलगायत विविध संकट देखा परेपछि मधेश प्रदेश सरकारले प्रभावित क्षेत्रलाई ‘सुख्खा क्षेत्र’, र संघीय सरकारले ‘संकटग्रस्त क्षेत्र’ घोषणा गरिसकेको छ । यही पृष्ठभूमिमा यो राहत कार्यक्रम सुरु गरिएको हो ।