भारत तस्करीको तयारीमा राखिएको ठूलो परिमाणको मदिरा सप्तरीबाट बरामद

राजविराज । सप्तरीको राजगढ गाउँपालिका–२ कमलपुरबाट भारत तर्फ तस्करी गर्न तयारी अवस्थामा राखिएको ठूलो परिमाणको मदिरा प्रहरीले बरामद गरेको छ । जिल्ला प्रहरी कार्यालय सप्तरीले मंगलबार एक पत्रकार सम्मेलनमार्फत बरामद मदिरा सार्वजनिक गरेको हो ।

जिल्ला प्रहरी कार्यालय सप्तरीका प्रमुख एसपी गौतम कुमार केसीका अनुसार, कमलपुरस्थित एक कुखुरा फार्ममा विशेष सूचनाको आधारमा खटिएको संयुक्त टोलीले मदिरा बरामद गरेको हो । उक्त टोलीमा जिल्ला प्रहरी कार्यालय, प्रहरी चौकी झुटकी र सशस्त्र प्रहरी बल बिओपी बनैनियाँका २६ जना सुरक्षाकर्मी सहभागी थिए ।

एसपी केसीले पत्रकार सम्मेलनमा जानकारी दिएअनुसार, “मामाश्री दिलवाले” ब्राण्डका ६४१ कार्टुन, कर्णाली गोल्ड ५ कार्टुन, कस्तुरी रक्सी ४३ कार्टुन, किङ्गफिसर बियर क्यान ४७ कार्टुन, वृक्ष रक्सी ४ कार्टुन, गोर्खा बियर क्यान २० कार्टुन र अर्ना बियर क्यान ३ कार्टुन गरी कुल ६ सयभन्दा बढी कार्टुन मदिरा बरामद गरिएको छ ।

बरामद मदिराको अनुमानित बजार मूल्य १२ लाख ८८ हजार ९७५ रुपैयाँ रहेको प्रहरीको अनुमान छ । त्यस्तै, तस्करी प्रयोजनका लागि प्रयोग गरिएको ३ लाख ५ हजार रुपैयाँ मूल्यको मोटरसाइकल र ३४ हजार रुपैयाँ बराबरको साइकल पनि बरामद गरिएको छ ।

प्रहरीले भारत तर्फ तस्करीका लागि प्रयोग हुँदै आएका विभिन्न भारतीय नम्बर प्लेट भएका ४ वटा मोटरसाइकल र ३४ वटा साइकल समेत नियन्त्रणमा लिएको जनाएको छ । बरामद सबै सामग्री आवश्यक कानुनी प्रक्रिया पूरा गरी भन्सार कार्यालयमा बुझाउने तयारी रहेको एसपी केसीले जानकारी दिए ।

प्रहरीका अनुसार, नेपालका सीमावर्ती बजारहरूबाट मदिरा संकलन गरी भारत तर्फ तस्करी गर्न लागिएको सूचना पछि उक्त फर्ममा छापा मारिएको थियो ।