चन्दन यादब 
राजविराज । जसपा नेपाल सप्तरीको जिल्ला अधिवेशन आज (बुधवार) दिउँसोदेखि सुरु हुँदैछ। राजविराज–२ स्थित बन्द रहेको साईकृष्णा मेडिकल कलेजको परिसरमा अधिवेशनको आयोजना गरिएको हो । तीन दिनसम्म चल्ने अधिवेशनको उद्घाटन जसपा नेपालका राष्ट्रिय अध्यक्ष उपेन्द्र यादवले गर्ने कार्यक्रम तय गरिएको छ ।
अधिवेशनअन्तर्गत आज उद्घाटन समारोह हुनेछ भने भोलिदेखि (बिहीवार) बन्दसत्र सुरु हुने जनाइएको छ । अधिवेशनमार्फत नयाँ जिल्ला नेतृत्व चयन हुनेछ ।
यस अधिवेशनको पूर्वसन्ध्यामा आन्तरिक विवादका कारण तालाबन्दी गरिएको जसपा सप्तरीको जिल्ला कार्यालय मंगलवार राति खोलेको छ। जिल्ला अध्यक्ष केदार यादव र आन्दोलनरत युवा–विद्यार्थी समूहबीच दुई बुँदे सहमति भएपछि कार्यालयको तालाचाबी खोलिएको हो ।
यसअघि, बिष्णुपुर गाउँपालिका–१ मा सम्पन्न वडा अधिवेशनमा भएको विवादपछि असन्तुष्ट युवा–विद्यार्थी नेताहरूले कार्यालयमा तालाबन्दी गरेका थिए ।
आगामी नेतृत्वका लागि वर्तमान अध्यक्ष केदार यादव, उपाध्यक्ष उमेशकुमार यादव र सचिव हरेराम यादवको दावेदारी रहेको चर्चा चुलिएको छ ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |