सप्तरीमा बाढी पूर्वसूचना प्रणाली सुदृढ बनाउने तयारी

राजविराज । हरेक वर्ष बाढी र डुबानका कारण सप्तरी जिल्लाका विभिन्न क्षेत्र प्रभावित हुँदै जनधनको ठूलो क्षति हुने गरेको छ । यस्तो क्षति न्यूनीकरण गर्न बाढीसम्बन्धी पूर्वसूचना प्रणालीलाई अझ प्रभावकारी बनाउने पहल थालिएको छ ।

सबल नेपाल र ईसिमोडको सहकार्यमा सप्तरीमा हाल कार्यान्वयनमा रहेका सूचना प्रणालीलाई सुदृढ बनाउँदै क्षति तथा जोखिम न्यूनीकरण गर्ने लक्ष्यसहित तयारी सुरु गरिएको हो ।

यसै सन्दर्भमा बिहीबार राजविराजमा सबल नेपाल तथा ईसिमोडको सहयोगमा आयोजित एकदिने कार्यशाला गोष्ठीमा प्रारम्भिक चेतावनी प्रणालीलाई अझ प्रभावकारी बनाउन आवश्यक पहलहरूबारे छलफल गरिएको थियो । कार्यशालामा समुदायमा आधारित चेतावनी प्रणाली र ईसिमोडले विकास गरेको प्रणालीबीच एकीकरण गर्ने उपायमा विशेष ध्यान केन्द्रित गरियो ।

खाडो नदीमा आउने वार्षिक बाढीबाट बच्न रूपनी गाउँपालिका, राजविराज नगरपालिका, र तिलाठी कोईलाडी गाउँपालिकाका क्षेत्रमा मोबाइल एसएमएसमार्फत समुदायस्तरसम्म समयमै सूचना पुर्‍याउनु अत्यावश्यक रहेको सहभागीहरूले बताए ।

तिलाठी कोईलाडी गाउँपालिकाका विपद् व्यवस्थापन अधिकृत राजेश झाका अनुसार, प्रत्येक वर्ष खाडो नदीको बाढीले लाखौँको जनधनको क्षति पुर्‍याउँदै आएको छ। यदि सूचना प्रणालीलाई प्रभावकारी बनाइयो भने जनधनको क्षति न्यूनीकरण गर्न सकिन्छ ।

यता, राष्ट्रिय विपद् जोखिम न्यूनीकरण तथा व्यवस्थापन प्राधिकरणले देशभरि बाढीबाट अति प्रभावित तथा जोखिमयुक्त क्षेत्रहरूको नक्साङ्कन गरेर पूर्वसूचना प्रदान गर्ने कार्ययोजना तयार गरिरहेको जानकारी दिइएको छ । जोखिममा रहेका स्थानहरूको यकिन विवरणपछि सम्बन्धित स्थानीय तहमार्फत विपद्का सम्भावित असरबारे बासिन्दालाई जानकारी गराइने छ ।

उक्त कार्यशालामा रेडक्रस सोसाइटी शाखा सप्तरीका अध्यक्ष जोगेन्द्र भगत, भलुवाही गणका सेनानी लवजंग थापा, ईसिमोडका डा. राजेश बहादुर थापा, हाइड्रोलोजिस्ट मनिष श्रेष्ठ, राजविराज नगरपालिकाकी महिला विकास अधिकृत अनिता चौधरी, महादेवा गाउँपालिकाका विपद् व्यवस्थापन स्रोत व्यक्ति कमल खत्री, र जिल्ला युवा सञ्जालका अध्यक्ष त्रिवेणी यादवले प्रभावकारी सूचना प्रणालीमार्फत नागरिकलाई सुरक्षित र सहज वातावरण निर्माण गर्नुपर्नेमा जोड दिए ।

सबल नेपालका उपाध्यक्ष भूपेश साहको अध्यक्षतामा सम्पन्न कार्यशालामा डा. राजेश बहादुर थापा, शैलेन्द्र शाक्य, निर्देशक दीपक झा, वरिष्ठ प्रबन्धक अशोक साहलगायतले सहजीकरण गरेका थिए ।

कार्यक्रममा रूपनी गाउँपालिका, तिलाठी कोईलाडी गाउँपालिका, राजविराज नगरपालिका, विपद् व्यवस्थापन शाखा, जेईडिसी, युवा सञ्जाल, बाल सञ्जाललगायत संस्थाको सक्रिय सहभागिता थियो ।