जसपा नेपाल सप्तरीको निर्वाचन तालिका परिमार्जन

राजविराज । जनता समाजवादी पार्टी (जसपा) नेपाल, सप्तरीको साउन १७ गतेका लागि तय गरिएको निर्वाचन कार्यतालिका परिमार्जन गरिएको छ ।

जिल्ला निर्वाचन समितिले शुक्रबार नयाँ तालिका सार्वजनिक गर्दै मतदाता नामावलीमा अत्यधिक दावी, विरोध र संशोधन परेकाले त्यसको छानबिन गर्न समय लाग्ने जनाउँदै निर्वाचन प्रक्रिया केही समयका लागि स्थगित गरेको जनाएको हो ।

जसपा नेपालको सप्तरी एकताको प्रथम अधिवेशन अन्तर्गत बिहीबार सम्पन्न बन्द सत्रबाट जिल्ला कार्यसमिति चयनको प्रयास सफल नभएपछि निर्वाचन प्रक्रिया अघि बढाइएको थियो ।

यसअघि तीनदिने निर्वाचन तालिका सार्वजनिक गरिएको थियो । तर नयाँ सूचना अनुसार अब २०८२ साउन १६ गते साँझ ७ बजे अन्तिम मतदाता नामावली प्रकाशित गरिनेछ । साउन १७ गते बिहान ८ देखि १० बजेसम्म मनोनयन दर्ता, १२:०५ बजे उम्मेदवार नामावली प्रकाशन, १२:१० देखि २ बजे सम्म नाम फिर्ता, २:३० देखि ३:३० सम्म दावी–विरोध, र साँझ ५ बजे अन्तिम नामावली प्रकाशित गरिनेछ ।

साउन १८ गते दिउँसो १ बजेसम्म मतदान र त्यसपछि दिउँसो ३ बजेदेखि मतगणना तथा नतिजा घोषणा गरिने तालिका सार्वजनिक गरिएको छ ।

यसअघि साउन १५, १६ र १७ गते तीन दिनका लागि तय गरिएको निर्वाचन तालिका हाल संशोधन गरिएको हो । निर्वाचन समितिद्वारा बिहीबार ५२४ जना मतदाताको नामावली प्रकाशित गरिएको थियो ।