चन्दन यादब 
राजविराज । ३३ औं प्रकाश स्मृति दिवसको अवसरमा विभिन्न व्यक्तित्वहरूलाई सम्मान गरिएको छ । बैध-प्रकाश मानव अधिकार पुरस्कार २०८२ वरिष्ठ अधिवक्ता तथा समाजसेवी हिम्मत सिंहलाई प्रदान गरिएको छ ।
शुक्रवार आयोजित विशेष कार्यक्रममा ईन्सेकका पूर्व अध्यक्ष सुबोधराज प्याकुरेलले सिंहलाई नगद ११ हजार रुपैयाँ र दोसल्ला ओढाएर सम्मान गरे ।
कार्यक्रममा उर्मिला देवी झा मैथिली गीत गायन पुरस्कार राजविराज–१६ की रूपादेवी देवलाई प्रदान गरिएको छ । उनलाई उच्च अदालत जनकपुर ईजलास राजविराजका मुख्य न्यायाधीश बामदेव ज्ञवालीले नगद २ हजार ५ सय रुपैयाँ र दोसल्ला ओढाएर सम्मान गरे ।
मुख्य न्यायाधीश ज्ञवालीले मानव अधिकार र मौलिक स्वतन्त्रता लोकतन्त्रका आधारशिला भएको उल्लेख गर्दै न्यायमा पहुँच बिना मानव अधिकार प्रत्याभूत हुन नसक्ने बताए। उनले ५० प्रतिशत मुद्दा मेलमिलापबाट समाधान गर्ने लक्ष्य लिएको पनि जानकारी दिए ।
कार्यक्रम बैध-प्रकाश मानव अधिकार पुरस्कार २०८२ का संस्थापक तथा प्रेस स्वतन्त्रता सेनानी बैधनाथ झाको अध्यक्षतामा सम्पन्न भयो । कार्यक्रममा प्रमुख जिल्ला अधिकारी भोला दाहाल, नेपाल पत्रकार महासंघ सप्तरी अध्यक्ष श्रवणकुमार देव, नागरिक समाज अध्यक्ष थानसिंह भन्सालीलगायतले शुभकामना मन्तव्य व्यक्त गरेका थिए । कार्यक्रमको सञ्चालन अधिकारकर्मी मनोहर पोखरेलले गरेका थिए ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |