खैरो हेरोइनसहित दुई तस्कर पक्राउ, नियन्त्रणमा लिन हवाई फायर

राजविराज । सप्तरी जिल्लाको छिन्नमस्ता गाउँपालिका वडा नं. १, बरहीबिरपुरमा लागुऔषधसहित दुई जनालाई प्रहरीले हवाई फायर गरी नियन्त्रणमा लिएको छ ।

जिल्ला प्रहरी कार्यालय सप्तरीका अनुसार प्रहरी निरीक्षक उदय कुमार रायको नेतृत्वमा लागुऔषध नियन्त्रण ब्युरो काठमाडौंबाट खटिएको संयुक्त टोलीले विशेष सुराकीको आधारमा बा ८ प १२२५ नम्बरको मोटरसाइकललाई चेकजाँच गर्न खोज्दा उनीहरूले भाग्ने प्रयास गरेका थिए ।

भाग्ने क्रममा प्रहरीले चार्जिङ पिस्टलबाट दुई राउन्ड हवाई फायर गरी उनीहरूलाई नियन्त्रणमा लिएको हो । पक्राउ पर्नेमा सप्तरीको छिन्नमस्ता गाउँपालिका–१, बरहीबिरपुर निवासी २९ वर्षीय विशाल राय र डाक्नेश्वरी नगरपालिका–७, मझौरा निवासी ३९ वर्षीय मनोज राय रहेका छन् ।

उनीहरूको साथबाट करिब १७७ ग्राम खैरो हेरोइनजस्तो देखिने पदार्थ, दुई थान मोबाइल फोन, एक थान मोटरसाइकल समेत बरामद गरिएको छ । उनीहरूलाई थप अनुसन्धानका लागि जिल्ला प्रहरी कार्यालय, सप्तरीमा ल्याइएको र आवश्यक कानुनी प्रक्रिया अघि बढाइएको प्रहरीले जनाएको छ ।