हत्या र लुटपाट योजनाका साथ कन्तलाल चौधरीको हत्या, ९ जना अभियुक्त सार्वजनिक

राजविराज । सप्तरीको सुरुङा नगरपालिका–८ मा जेठ २२ गते राति हत्या गरिएका कन्तलाल चौधरीको घटनामा संलग्न ९ जना पक्राउ परेका छन् । घटना केवल हत्या नभई सुनियोजित लुटपाटसहितको योजना रहेको प्रहरीले जनाएको छ ।

पक्राउ परेकाहरूमा सुरुङा–८ का राजेश कुमार मरिक, संजय मरिक, बोदे बर्साइन–२ का दिपेन मरिक, खडक–११ का हरिकिसुन मरिक, शम्भुनाथ–८ का दिपक मरिक (२४), उदयपुर बेलका–१ का चन्दर मरिक , सुरुङा–७ का राजु कुमार बिक, सिरहा लहान–६ का महेन्द्र गोड्से र लहान–८ का उमेश साह सोनार रहेका छन् ।

प्रहरीका अनुसार चौधरीको हत्यापछि अभियुक्तहरूले उनका गरगहना लुटेका थिए। उनीहरूबाट कटुवा पेस्तोल, २ राउन्ड गोली, १ थान खुकुरी र लुटिएको सुन बरामद गरिएको छ ।

जिल्ला प्रहरी कार्यालय सप्तरीमा आयोजित पत्रकार सम्मेलनमा मधेश प्रदेश प्रहरी प्रमुख डीआईजी उमा प्रसाद चतुर्वेदीले अनुसन्धान टोलीलाई धन्यवाद दिंदै दोषीलाई कानुनी दायरामा ल्याउन प्रहरीले देखाएको सक्रियता प्रशंसनीय भएको बताए ।

अभियुक्तहरूविरुद्ध डाँका र कर्तव्य ज्यान मुद्दामा अनुसन्धान जारी रहेको छ। सात दिनको म्याद थप गरी थप अनुसन्धान भइरहेको प्रहरी प्रमुख एसपी गौतम केसीले जानकारी दिए ।