प्रहरीको गोलीबाट मृत्यु भएपछि राजविराजमा विरोध प्रदर्शन

राजविराज । सप्तरीको राजगढ गाउँपालिकामा प्रहरीले चलाएको गोलीबाट एक स्थानीय युवकको ज्यान गएपछि जिल्लाको सदरमुकाम राजविराजमा तनावपूर्ण अवस्था सिर्जना भएको छ ।

घटनापछि आक्रोशित मृतकका आफन्त तथा स्थानीय बासिन्दाले जिल्ला प्रहरी कार्यालय अगाडि टायर बालेर विरोध प्रदर्शन गरेका छन् । उनीहरूले प्रहरी प्रशासनविरुद्ध नाराबाजी गर्दै न्यायको माग गरेका छन् ।

प्रहरीका अनुसार राजगढ गाउँपालिका–२ मा मंगलवार राति मध्यराततिर मदिरा भारततर्फ तस्करी भइरहेको सूचना पाएपछि एक प्रहरी टोली सो स्थानमा पुगेको थियो । त्यहाँ पुगेको टोलीमाथि स्थानीयले अचानक ढुंगामुढा गरेपछि प्रहरीले आत्मरक्षाका लागि गोली चलाएको जनाइएको छ ।

गोली लागेर स्थानीय लालु यादव घाइते भएका थिए । ३७ वर्षीय यादवलाई तत्काल उपचारका लागि गजेन्द्रनारायण सिंह अस्पताल, राजविराजमा लगिएको थियो तर उपचारको क्रममा उनको मृत्यु भएको हो ।

प्रहरी र स्थानीयबीचको झडप, गोली प्रहार र त्यसपछि भएको मृत्युले स्थिति तनावपूर्ण बनेको छ । प्रदर्शनलाई ध्यानमा राख्दै सुरक्षाका लागि अतिरिक्त प्रहरी परिचालन गरिएको छ भने घटनाबारे विस्तृत छानबिन अघि बढाइएको जिल्ला प्रहरी कार्यालय सप्तरीले जनाएको छ ।