राजगढ गोलीकाण्ड: संघर्ष समितिसँग ५ बुँदे सहमति, आन्दोलन फिर्ता

राजविराज । प्रहरीको गोली लागेर लालु प्रसाद यादवको ज्यान गएको राजगढ गोलीकाण्डमा संघर्ष समिति र जिल्ला प्रशासन कार्यालय सप्तरीबीच पाँच बुँदे सहमति भएपछि चर्किएको आन्दोलन अन्ततः स्थगित गरिएको छ ।

प्रमुख जिल्ला अधिकारीको संयोजनमा बिहीबार बसेको सर्वपक्षीय बैठकले मृतकप्रति श्रद्धाञ्जली अर्पण गर्दै घटनाप्रति गहिरो दुःख व्यक्त गर्‍यो । बैठकमा प्रमुख मागको रूपमा उठाइएको सर्च तथा गस्तीमा खटिएका प्रहरी निरीक्षक बीरेन्द्र कुमार यादवलाई तत्काल जिम्मेवारीबाट हटाउन सम्बन्धित निकायमा पत्राचार गर्ने निर्णय गरिएको छ ।

सहमति अनुसार, मृतक यादवको शव उनका आफन्त तथा आन्दोलनरत पक्षले बुझ्ने र परम्परागत धार्मिक संस्कारअनुसार अन्त्येष्टि गर्नेछ । संघर्ष समितिले आन्दोलनका सबै कार्यक्रमहरू फिर्ता लिने प्रतिबद्धता जनाएको छ। साथै, घटनाको निष्पक्ष छानबिनका लागि उच्चस्तरीय समिति गठनको सिफारिस गर्ने र क्षतिपूर्तिसम्बन्धी निर्णय छानबिन समितिको प्रतिवेदनको आधारमा गरिने सहमति भएको छ ।

यस घटनापछि आक्रोशित स्थानीयबासी, मृतकका आफन्त र राजनीतिक दलहरूले संयुक्त संघर्ष समिति गठन गरी राजविराजमा चरणबद्ध आन्दोलन गरेका थिए । दबाबस्वरूप सप्तरी उद्योग वाणिज्य संघको आह्वानमा बिहीबार राजविराजका सम्पूर्ण उद्योग, कलकारखाना तथा बजार बन्द रहेका थिए ।

प्रहरीको गोलीप्रति स्थानीयले गम्भीर आपत्ति जनाउँदै आएका थिए। आन्दोलनकारीहरू दोषीलाई कारबाहीको माग गर्दै सडकमा उत्रिएका थिए । अहिलेको सहमतिलाई प्रारम्भिक सफलता मानिएपनि पीडित पक्षले न्याय सुनिश्चित नभएसम्म चुप बस्ने अवस्था नरहेको संकेत गरेका छन् ।

अब चासोको केन्द्र बिन्दु छ—छानबिन समिति गठन कहिले हुन्छ, र त्यसले निष्पक्ष सत्य उजागर गर्छ कि गर्दैन ।