वडा कार्यालयमा गरिएको तालाबन्दी सेवाग्राहीले तोडे, नियमित सेवा पुनः सुरु

भारदह । सप्तरीको हनुमाननगर कंकालिनी नगरपालिका–४ मधुवापुरस्थित वडा कार्यालयमा गरिएको तालाबन्दी सेवाग्राहीले तोडेका छन् ।

बिहीबार स्थानीय सेवाग्राहीहरुले “जनताको सेवा ठप्प गर्न पाइँदैन”, “वडा कार्यालयमा तालाबन्दी गर्न पाइँदैन” जस्ता नारासहित ताला तोडेका हुन् ।

तालाबन्दीका कारण राहदानी सिफारिश, नागरिकता प्रमाणपत्र लगायतका नियमित सेवा प्रभावित भएको भन्दै सेवाग्राहीहरुले आफूहरू बाध्य भएर ताला तोड्नुपरेको बताएका छन् ।

गत आइतबार पूर्व वडाध्यक्ष नागेन्द्र मण्डल, स्थानीय हुमेन्द्र मुखियालगायतले हालका वडाध्यक्ष मौली मण्डलको निर्देशनमा ह्युम पाइप अन्यत्र स्थानान्तरण गरिएको भन्दै वडा कार्यालयमा तालाबन्दी गरेका थिए ।

तर वडाध्यक्ष मण्डलले उक्त पाइपको सट्टामा नयाँ पाइप जडान गरिएको र आवश्यकता अनुसार पुनःस्थापनाको व्यवस्था गर्न सकिने स्पष्ट पार्दै तालाबन्दीप्रति खेद प्रकट गरेका थिए ।

तालाबन्दी हटाइएपछि वडा कार्यालयका सम्पूर्ण सेवा पुनः सुचारु भएको वडाले जनाएको छ । स्थानीयले आफैँ ताला खोलेपछि अब सेवा नियमित रुपमा सञ्चालन हुने कार्यालय स्रोतले जानकारी दिएको छ ।