सप्तरीको पातोबाट ३९६ किलो गाँजा बरामद

राजविराज । डाक्नेश्वरी नगरपालिका- ५ पातोस्थित महादेवा टोलबाट ठूलो मात्रामा गाँजा बरामद भएपछि सीमावर्ती क्षेत्रको लागूऔषध कारोबारको चर्चा पुनः चर्किएको छ ।

सप्तरी प्रहरीका प्रवक्ता एवं डीएसपी जितेन्द्र कुमार बस्नेतका अनुसार नहर छेउको धान खेत र बाँसघारीमा छरिएका अवस्थामा १७ वटा बोकामा राखिएको करिब ३९६ किलो गाँजा फेला परेको हो ।

गस्तीमा रहेको नेपाल प्रहरी र सशस्त्र प्रहरीको संयुक्त टोलीले उक्त गाँजा बरामद गरेको प्रहरीले जनाएको छ । बरामद गाँजासम्बन्धी थप अनुसन्धान भइरहेको प्रहरीको भनाइ छ ।