सप्तरीमा भाइको बञ्चरो प्रहारबाट दाजुको मृत्यु

राजविराज । सप्तरीमा भाइले गरेको बञ्चरो प्रहारबाट दाजुको मृत्यु भएको छ ।

राजविराज नगरपालिका–१ पडरिया निवासी ४० वर्षीय लोकेन्द्र झाको शनिबार बिहान बञ्चरो प्रहारबाट ज्यान गएको प्रहरीले जनाएको छ ।

प्रहरीका अनुसार झाका ३० वर्षीय भाइ नरेन्द्रले बिहान करिब १० बजे घरमै बञ्चरो प्रहार गरेका थिए । गम्भीर घाइते भएका लोकेन्द्रलाई राजविराजमा प्राथमिक उपचारपछि थप उपचारका लागि विराटनगर पुर्‍याइएकाे थियो । तर, उपचारको क्रममा उनको मृत्यु भएको सप्तरी प्रहरीका प्रवक्ता डीएसपी जितेन्द्रकुमार बस्नेतले जानकारी दिए ।

प्रारम्भिक अनुसन्धानमा घरायसी विवादका कारण घटनामा बञ्चरो प्रहार भएको देखिएको प्रहरीले जनाएको छ । आरोपी नरेन्द्र हाल फरार रहेकाे र उनको खोजी कार्य भइरहेको प्रहरीले जनाएको छ ।