राजगढ पुगेर मुख्यमन्त्री सिंहको सान्त्वना, “सत्य छिपिँदैन, न्याय अवश्य हुनेछ”

सप्तरी । मधेश प्रदेशका मुख्यमन्त्री सतिश कुमार सिंह आइतवार सप्तरीको राजगढ–२ कमलपुर पुगेका छन् । उनले गोली लागेर मृत्यु भएका ३६ वर्षीय लालु यादवको घर र घटनास्थलमा पुगेर शोकाकुल परिवार, स्थानीयवासी तथा नागरिक समाजसँग भेटघाट गरेका छन् ।

स्वर्गीय यादवप्रति श्रद्धाञ्जली अर्पण गर्दै मुख्यमन्त्री सिंहले पीडित परिवारलाई धैर्य धारण गर्ने शक्ति भगवानले प्रदान गरुन् भन्ने कामना गरे। उनले घटनाबारे विस्तृत जानकारी लिँदै आवश्यक अनुसन्धान र छानबिनको कार्य तीव्रगतिमा भइरहेको बताए ।

मुख्यमन्त्री सिंहले सत्य तथ्य छिट्टै सार्वजनिक हुनेमा पूर्ण विश्वास व्यक्त गर्दै दोषीमाथि कानूनी कारबाही सुनिश्चित गर्ने प्रतिवद्धता जनाएका छन् ।