मधेश प्रदेशमा राजस्व संकलनमा अभूतपूर्व वृद्धि, सात वर्षमा दोब्बरभन्दा बढी

जनकपुरधाम । मधेश प्रदेशले आर्थिक वर्ष २०८१/८२ मा आन्तरिक राजस्व संकलनमा सात वर्षकै उच्च स्तर हासिल गरेको छ । यस वर्ष प्रदेशले ५ अर्ब ५४ करोड ७२ लाख ३३ हजार रुपैयाँ राजस्व संकलन गरेको छ, जुन विगतका वर्षहरूसँग तुलना गर्दा दोब्बरभन्दा बढी हो ।

अर्थ मन्त्रालयका सचिव रामकुमार महतो अनुसार यस प्रगतिका प्रमुख कारण कर प्रशासन सुदृढीकरण, राजस्व चुहावट नियन्त्रण, डिजिटल प्रणालीको विस्तार र आन्तरिक आर्थिक गतिविधिमा वृद्धि हुन् ।

विगतका केही वर्षहरूमा संकलनमा उतार–चढाव देखिएको थियो । आर्थिक वर्ष ०७५/७६ मा २ अर्ब ६६ करोड १५ लाख ३६ हजार, ०७६/७७ मा २ अर्ब ७५ करोड ७२ लाख ४१ हजार, ०७७/७८ मा १ अर्ब ९५ करोड ४८ लाख ५१ हजार, ०७८/७९ मा २ अर्ब ८८ करोड ६ लाख ३२ हजार, ०७९/८० मा ३ अर्ब ९० करोड २५ लाख २८ हजार र ०८०/८१ मा ३ अर्ब ५ करोड ९२ लाख ३१ हजार रुपैयाँ संकलन भएको थियो ।

आन्तरिक राजस्व संकलनमा आएको यो वृद्धि प्रदेश सरकारले वित्तीय व्यवस्थापन र कर प्रणाली सुधारमा गरेका प्रयासको परिणामस्वरूप देखिएको हो । चालु आर्थिक वर्षको यस प्रगतिले मधेश प्रदेशको आर्थिक स्थायित्व र आन्तरिक स्रोतको क्षमतामा विश्वास बढाएको छ ।