सप्तरीमा ई–रिक्साको ठक्करबाट पाँच वर्षीय बालकको मृत्यु

राजविराज । सप्तरीको बोदेबर्साइन नगरपालिका–७ स्थित देउरी भित्रि सडक खण्डमा ई–रिक्साको ठक्करबाट मामाघर आएका एक बालकको ज्यान गएको छ ।

भारतको बिहार मधुवनी जिल्ला ग्राम पंचायत निन्दरपुर निवासी राजकुमार सदायका पाँच वर्षीय छोरा आरजे सदाय शनिबार दिउँसो बाटो क्रस गर्ने क्रममा ई–रिक्साले ठक्कर दिँदा गम्भीर घाइते भएका थिए । उनलाई तत्काल गजेन्द्र नारायण सिंह अस्पताल, राजविराज ल्याइएकोमा चिकित्सकले मृत घोषित गरेका छन् ।

ठक्कर दिने ई–रिक्सा र चालक बोदेबर्साइन नगरपालिका–१० श्रीपुरका १७ वर्षीय राकेश कुमार मण्डललाई प्रहरीले नियन्त्रणमा लिएको छ । ई–रिक्साको अवस्था ‘अन टेस्ट’ रहेको र घटनाबारे थप अनुसन्धान भइरहेको जिल्ला प्रहरी कार्यालय सप्तरीका प्रवक्ता डीएसपी जितेन्द्र कुमार बस्नेतले जानकारी दिए ।