रौतहटमा सुटकेसभित्र भेटिएको शवको सनाखत, रुबी देवी साहको रुपमा पहिचान

रौतहट । रौतहटको गौर–सिरसिया सडक खण्डमा शनिबार राति सुटकेसभित्र फेला परेको शवको सनाखत भएको छ । मृतकको पहिचान माधव नारायण नगरपालिका–६ माधोपुरकी ३० वर्षीया रुबी देवी साहको रूपमा भएको प्रहरीले जनाएको छ ।

रुबी देवी शनिबार बेलुकी ब्युटी पार्लर जान्छु भन्दै डेराबाट निस्किएकी थिइन् । सदरमुकाम गौर–२ महादेव पट्टीमा डेरा गरेर बस्दै आएकी उनले बेलुका ६ बजेदेखि परिवारसँग सम्पर्कविहीन बनेकी थिइन् । राति करिब १० बजे सडक पेटीमा डोरीले बाँधिएको सुटकेस फेला परेको थियो ।

आज बिहान जिल्ला प्रहरी कार्यालय रौतहटको टोलीले सुटकेस खोलेपछि हत्या गरिएको अवस्थामा महिलाको शव भेटिएको हो । मृतक रुबी ३५ वर्षीय शिवसागर साहकी पत्नी हुन् । शिवसागर साह रक्सा टोल निवासी साधु शरण साहका छोरा हुन्। मृतकको परिवार केही वर्षअघि भारतको बिहार, मुजफ्फरपुरबाट बसाइ सरेर रौतहट आएका थिए ।

सुटकेस भेटिएको हल्ला फैलिएपछि रुबीकी आमा मिथिलेश देवीले शव आफ्नी छोरीकै भएको हुनसक्ने भन्दै प्रहरीलाई जानकारी गराएकी थिइन् । त्यसपछि प्रहरीले शवको सनाखत पुष्टि गरेको हो ।

अनुसन्धानमा खटिएका प्रहरी निरीक्षक रुद्र कँडेलका अनुसार घटनाबारे आवश्यक अनुसन्धान भइरहेको छ । “सुटकेसमा भेटिएको शव रुबी देवी साहकै भएको पुष्टि भएको छ । यसबारे अनुसन्धान भइरहेको छ र घटनाको छिट्टै पत्ता लाग्नेछ,” निरीक्षक कँडेलले प्रतिक्रिया दिएका छन् ।