सप्तरीमा जसपा नेपालद्वारा भूमि विधेयकविरुद्ध सङ्घर्षको सुरुवात

राजविराज । जसपा नेपाल सप्तरीले संसदबाट हालै पारित भूमि सम्बन्धी विधेयकविरुद्ध व्यापक विरोध कार्यक्रम सञ्चालन गर्ने निर्णय गरेको छ । सोमबार राजबिराजमा आयोजित विस्तारित बैठकमा भदौ ९ देखि १६ गतेसम्म विरोध कार्यक्रमको तालिका सार्वजनिक गरिएको हो । बैठकले जिल्लाका चारै निर्वाचन क्षेत्रमा बिरोध कार्यक्रम गर्ने निर्देशन दिएको छ ।

जिल्ला अध्यक्ष केदार यादबका अनुसार भदौ ९ गते सोमबार जिल्ला समितिको अगुवाईमा राजबिराजमा विरोध र्याली गरिनेछ । त्यसपछि निर्वाचन क्षेत्र १ मा भदौ ११ गते भारदह, निर्वाचन क्षेत्र ४ मा भदौ १२ गते बरसाईन चौक, निर्वाचन क्षेत्र २ मा भदौ १३ गते तोपा र निर्वाचन क्षेत्र ३ मा भदौ १४ गते पथरगडामा विरोध प्रदर्शन हुनेछ। साथै भदौ ९ देखि १५ गतेसम्म देशका विभिन्न सहरमा पनि विरोध कार्यक्रम हुने बताइएको छ ।

अध्यक्ष यादबले विधेयकले तराई/मधेस क्षेत्रलाई मरुभूमिकरणमा लैजान सक्ने आरोप लगाउँदै भने, “भूमि सम्बन्धी विधेयक मुलुक र जनताको हितमा छैन । भू-माफिया र जग्गा दलालको हित हुने भएकाले जसपा नेपाल सुरुबाटै यसको विपक्षमा रहेको हो ।” उनले थपे, “सरकारको कृषि, सहकारी तथा प्राकृतिक स्रोत समितिले राष्ट्रिय हित विपरीत रहेको विवादित विधेयकको प्रक्रिया अघि बढाएपछि, जसपा नेपालले ‘भूमि र वन बचाऔं, मधेसलाई मरुभूमिकरण हुनबाट जोगाऔं’ अभियान अन्तर्गत कडा प्रतिकार गर्ने निर्णय गरेको छ ।”

बैठकमा जसपा केन्द्रीय सदस्य तथा अनुशासन समितिका जगदेव यादब, प्रदेश सभा सदस्य अनिरुद्ध प्रसाद यादव, किरण साह, पुनम यादब, उपमा देव, गीता यादब, विकास तिवाडी, रमिला साह, जसपा मधेश प्रदेश सचिव दिनेश यादब, सदस्य किशोर कुमार यादब लगायतका नेताहरूको उपस्थिती रहेको थियो। कार्यक्रमको सञ्चालन सचिव निरज मुक्तीले गरेका थिए ।