पूर्व गाउँपालिका अध्यक्ष टुटु बाबूको निधन

राजविराज । जनता समाजवादी पार्टी (जसपा) नेपालका केन्द्रीय सल्लाहकार तथा महादेवा गाउँपालिकाका पूर्व अध्यक्ष दीपक कुमार यादव (टुटु बाबू)को आज अपराह्न निधन भएको छ ।

क्यान्सर रोगबाट पीडित यादव केही महिनादेखि उपचाररत थिए । चिकित्सकको निगरानीमा उपचार गराइरहेका उनको आफ्नै निवासमै निधन भएको परिवारजनले जानकारी दिएका छन् ।

गाउँपालिका अध्यक्षको कार्यकालमा यादवले स्थानीय सडक, खानेपानी, विद्यालय र स्वास्थ्य संस्थाको सुधारलाई प्राथमिकता दिएका थिए । साथै महिला, दलित र युवाको सहभागिता बढाउन उनले विभिन्न कार्यक्रम सञ्चालन गरेका थिए ।

जसपा नेपाल सप्तरीका जिल्ला उपाध्यक्ष लक्ष्मण यादवका अनुसार जनमैत्री र सरल स्वभावका कारण दीपक यादव स्थानीय जनतामाझ अत्यन्त लोकप्रिय रहेका थिए ।

उनका पिता विशेश्वर प्रसाद यादवले राणा तथा पञ्चायती शासनविरुद्धका आन्दोलनमा महत्वपूर्ण योगदान गरेका थिए । पिताबाटै प्रेरित भई दीपक विद्यार्थी जीवनदेखि नै राजनीतिमा सक्रिय बनेका थिए ।

पछिल्ला वर्षहरूमा उनले प्रजातान्त्रिक आन्दोलन, जनआन्दोलन र मधेश आन्दोलनमा पनि सक्रिय सहभागिता जनाएका थिए । स्व. यादवका एक छोरा, एक छोरी र पत्नी छन् ।