बोदेबरसाईनमा जसपाको भूमि विधेयकविरुद्ध र्‍याली

सप्तरी । उपेन्द्र यादव नेतृत्वको जनता समाजवादी पार्टी (जसपा) नेपालले भूमि सम्बन्धी विधेयकविरुद्ध देशव्यापी विरोध प्रदर्शन थालेको छ । केन्द्रको निर्देशनअनुसार सप्तरी क्षेत्र नम्बर ४ को बोदेबरसाईनमा पनि आज विरोध र्‍याली तथा कोण सभा गरिएको छ ।

बरसाईनको शत्रुधन चोकबाट निस्केको र्‍याली विभिन्न स्थान परिक्रमा गर्दै कोण सभामा परिणत भएको थियो । कोण सभामा वक्ताहरूले भूमि विधेयक मुलुक र जनताको हित विपरीत रहेको आरोप लगाउँदै विधेयक फिर्ता लिन सरकारसँग माग गरेका थिए ।

उनिहरूले उक्त विधेयक भू–माफिया र जग्गा दलालको पक्षमा बनेको दाबी गर्दै यसले वन विनाश, पर्यावरणीय संकट र तराई–मधेशलाई मरुभूमिकरणतर्फ धकेल्ने चेतावनी दिए । जसपाले शुरुदेखि नै विधेयकको विरोध गर्दै आएको बताउँदै “भूमि र वन बचाऊँ, मधेशलाई मरुभूमिकरण हुनबाट जोगाऊँ” भन्ने नारासहित भदौ १५ गतेसम्म विरोध कार्यक्रम जारी रहने जनाएको छ ।

बरसाईनमा भएको प्रदर्शनमा जसपा नेपाल अनुशासन समिति संयोजक जगदेव यादव, श्यामदेव यादव, केन्द्रीय सदस्य शैलेन्द्र मोहन झा, पुनम यादव, डा. बबी यादव, रमिला साह, जिल्ला अध्यक्ष केदार प्रसाद यादव, जिल्ला उपाध्यक्ष लक्ष्मण यादव, बोदेबरसाईन नगरपालिकाकी उपप्रमुख रेणुका साह, खडक नगरपालिकाकी उपप्रमुख रीता चौधरी, युवा नेता दिनेश यादवसहित सयौँ नेता तथा कार्यकर्ताको सहभागिता रहेको थियो ।