राजबिराजमा भूमिहीन सुकुम्बासीलाई निस्सा वितरण सुरु

राजबिराज । राजबिराज नगरपालिका भित्र बसोवास गर्दै आएका भूमिहीन सुकुम्बासी तथा अव्यवस्थित बसोवासीलाई जग्गाको निस्सा वितरण सुरु गरिएको छ ।

लामो समयदेखि सार्वजनिक जमिनमा बसोबास गर्दै आएका सुकुम्बासीलाई राष्ट्रिय भूमि आयोग जिल्ला समिति, सप्तरीले निस्सा वितरण थालेको हो । राजबिराज नगरपालिकामा निवेदन पेस गरिसकेका सुकुम्बासीहरूको पहिचान गरी पहिलो चरणमा निस्सा वितरण गरिएको आयोगले जनाएको छ ।

भूमि आयोग सप्तरीका अध्यक्ष अखिलेश झाले छिट्टै जग्गाधनी प्रमाण-पुर्जा वितरण गर्ने जानकारी दिए । उहाँका अनुसार केन्द्रबाट नापजाँच टोली आएर जग्गा छुट्याएपछि पुर्जा वितरण गरिनेछ ।

निस्सा वितरण कार्यक्रम राजबिराज नगरपालिकामा एक औपचारिक समारोहमार्फत उद्घाटन गरिएको हो । उद्घाटनपश्चात् केही भूमिहीन सुकुम्बासीलाई निस्सा हस्तान्तरण गरिएको र बाँकी निस्सा सम्बन्धित वडाबाट वितरण थालिएको कार्यवाहक नगरप्रमुख ईसरत परविनले जानकारी दिनुभयो ।

राजबिराज नगरपालिकाबाट अव्यवस्थित बसोबासीका ५४५ भूमिहीन दलितका ६३६ र भूमिहीन सुकुम्बासीका ५०८ निवेदन जिल्ला समितिमा दर्ता भएको बताइएको छ ।

कार्यक्रममा कार्यवाहक नगरप्रमुख परविन, भूमि आयोग समितिका अध्यक्ष अखिलेश झा, नगरपालिकाका प्रमुख प्रशासकीय अधिकृत हरिकिसोर चन्द्रबंशी, वडा नं. ८ का अध्यक्ष जय नारायण मण्डल, वडा नं. १२ का अध्यक्ष रामचन्द्र यादव, वडा नं. ४ का अध्यक्ष दिनेश कसेरा, वडा नं. ३ का अध्यक्ष अनिल दास, वडा नं. १४ का अध्यक्ष जगदिश मण्डल, कार्यपालिका सदस्य सोनी रजक, ललित कर्ण, घुरनी रजक, वडा सदस्य सुभाष साह, रामानन्द देव लगायतको उपस्थितिमा निस्सा वितरण गरिएको थियो ।