ताेपामा भूमि विधेयक र गौर घटनामा उपेन्द्र यादवविरुद्धको षड्यन्त्रको विरोधमा झाडू प्रदर्शन

राजबिराज । सप्तरीको तिलाठी कोईलाडी गाउँपालिका अन्तर्गत ताेपामा भूमि विधेयक र गौर घटनामा जसपा नेपालका अध्यक्ष उपेन्द्र यादवमाथि छानबिन गर्ने षड्यन्त्रविरुद्ध बृहत झाडू प्रदर्शन गरिएको छ ।

जनता समाजवादी पार्टी (जसपा) नेपाल जिल्ला समिति सप्तरीले भूमि विधेयक र गौर घटनामा उपेन्द्र यादवलाई फसाउन खोजिएको भन्दै विरोध प्रदर्शन तथा कोणसभा आयोजना गरेको हो ।

जिल्ला अध्यक्ष केदारप्रसाद यादवको नेतृत्वमा निकालिएको विरोध र्‍यालीमा  सहभागीहरूले “लाल आयोगको प्रतिवेदन सार्वजनिक गर”, “राष्ट्रिय मानव अधिकार आयोगको प्रतिवेदन सार्वजनिक गर”, “खिलराज रेग्मी आयोगको प्रतिवेदन सार्वजनिक गर”, “राजनीतिक मुद्दा खारेज गर”, “औपनिवेशिक शासन अन्त गर” र “थारु–मधेशी एक होऔँ” जस्ता नारासहित नगरको विभिन्न भाग परिक्रमा गरी कोणसभामा परिणत गरेका थिए ।

कोणसभालाई सम्बोधन गर्ने वक्ताहरूले भूमि विधेयक अगाडि बढाए वा गौर घटनामा उपेन्द्र यादवलाई फसाउने षड्यन्त्र गरिए सशक्त आन्दोलन गर्ने चेतावनी दिए। उनीहरूले तराई–मधेशलाई मरुभूमि बनाउने राष्ट्रविरोधी भूमि विधेयकलाई जसपाले विरोध गरेको निहुँमा सरकारकै इसारामा पार्टी अध्यक्षमाथि छानबिन गर्ने परमादेश जारी गरिएको दाबी गर्दै यस्तो कदम स्वीकार्य नहुने बताए ।

सरकारले देशलाई द्वन्द्वतर्फ धकेल्दै लगेको आरोप लगाउँदै वक्ताहरूले चौथो मधेश आन्दोलन सुरु भइसकेको दाबीसमेत गरे र सम्पूर्ण नेता–कार्यकर्तालाई आन्दोलनको तयारीमा जुट्न आह्वान गरे ।

जिल्ला अध्यक्ष केदारप्रसाद यादवको अध्यक्षतामा सम्पन्न कोणसभामा जसपा नेपालका केन्द्रीय अनुशासन विभाग प्रमुख जगदेव यादव, केन्द्रीय सदस्य उपमा देव, विकास तिवारी, डा. बबीसिंह यादव, रमिला साह, पुनम यादव, युवा नेता दिनेश यादव, किशोरकुमार यादव, राजेश्वर राय, विनोद यादव, जिल्ला उपाध्यक्ष लक्ष्मण यादव, सचिव निरज मुक्ती, कोषाध्यक्ष अरविन्द यादवलगायत सयौं नेता–कार्यकर्ताको सहभागिता थियो ।

जसपाले पहिलो चरणको आन्दोलन अन्तर्गत सप्तरीका चारै निर्वाचन क्षेत्रमा विरोध प्रदर्शन तथा कोणसभा गर्ने कार्यक्रम तय गरेको छ। त्यसअनुसार बुधबार भारदह र बिहीबार बोदेबरसाईनमा कार्यक्रम सम्पन्न भइसकेका छन् । भोलि शनिबार भने डाक्नेश्वरी नगरपालिकाको पथरगडामा बृहत विरोध प्रदर्शन तथा कोणसभा आयोजना हुने सचिव निरज झाले जानकारी दिए ।