चन्दन यादब 
राजबिराज । सप्तरीको डाक्नेश्वरी नगरपालिका–स्थित पथरगाडामा भूमि विधेयक र गौर घटनामा उपेन्द्र यादवमाथि छानबिन गर्ने षड्यन्त्रविरुद्ध बृहत् प्रदर्शन गरिएको छ ।
शनिवार जनता समाजवादी पार्टी (जसपा) नेपाल जिल्ला कमिटी सप्तरीले भूमि विधेयक र गौर घटनामा पार्टी अध्यक्ष उपेन्द्र यादवलाई फसाउने षड्यन्त्रको विरोधस्वरूप प्रदर्शन तथा कोणसभा आयोजना गरेको हो ।
जसपा नेपाल डाक्नेश्वरी नगरपालिका नगर समितिका अध्यक्ष लक्षणदेव साहको नेतृत्वमा निकालिएको विरोध र्यालीमा “लाल आयोगको प्रतिवेदन सार्वजनिक गर”, “राष्ट्रिय मानव अधिकार आयोगको प्रतिवेदन सार्वजनिक गर”, “खिलराज रेग्मी आयोगको प्रतिवेदन सार्वजनिक गर”, “राजनीतिक मुद्दा खारेज गर”, “औपनिवेशिक शासन अन्त गर”, “थारु–मधेशी एक होऔं” लगायतका नाराबाजी गर्दै नगरको विभिन्न भागको परिक्रमा गरी कोणसभामा परिणत गरिएको थियो ।
कोणसभालाई सम्बोधन गर्दै जसपा नेपालका महासचिव मनिष सुमनले भूमि विधेयकलाई अघि बढाइए वा गौर घटनामा उपेन्द्र यादवलाई फसाउने षड्यन्त्र गरिएमा पार्टी सशक्त आन्दोलनमा उत्रिने चेतावनी दिए। उनले तराई–मधेसलाई मरुभूमि बनाउने तथा राष्ट्रहितविपरीत रहेको भूमि विधेयकप्रति पार्टीले विरोध जनाएको निहुँमा सरकारको इसारामा अध्यक्षमाथि छानबिन गर्ने परमादेश आएको भन्दै यसलाई स्वीकार नगर्ने स्पष्ट गरे ।
राष्ट्रिय सभा सदस्य पुजा चौधरीले सरकारले देशलाई द्वन्द्वतर्फ धकेलेको आरोप लगाउँदै, चौथो मधेस विद्रोह सुरु भइसकेको भन्दै आन्दोलनको तयारीमा जुट्न सम्पूर्ण नेताकार्यकर्तालाई आह्वान गरिन् ।
उक्त विरोध र्यालीमा जिल्ला अध्यक्ष केदार प्रसाद यादव, जसपा केन्द्रीय तथा मधेश प्रदेश सभा सदस्य किरण साह, उपमा देव, शैलेन्द्र मोहन झा, डा. बबीसिंह यादव, रमिला साह, राजगढ गाउँपालिका उपाध्यक्ष रेणु मण्डल, डाक्नेश्वरी नगरपालिका पूर्व नगरप्रमुख शिवनारायण साह, युवा नेता दिनेश यादव, राजेश्वर राय, जिल्ला उपाध्यक्ष लक्ष्मण यादव, सचिव निरज मुक्ती, कोषाध्यक्ष अरविन्द यादव, बिनोद यादवसहित सयौं नेता–कार्यकर्ताको उपस्थिति थियो ।
जसपा नेपालले पहिलो चरणको आन्दोलन अन्तर्गत सप्तरीका चारवटै निर्वाचन क्षेत्रमा विरोध प्रदर्शन तथा कोणसभा गर्ने कार्यक्रम तय गरेको थियो। सोअनुसार बुधबार क्षेत्र नं. १ स्थित भारदहमा, बिहीबार क्षेत्र नं. ४ अन्तर्गत बोदेबरसाईनमा, शुक्रबार क्षेत्र नं. २ अन्तर्गत तोपामा कार्यक्रम सम्पन्न भइसकेको र शनिबार क्षेत्र नं. ३ अन्तर्गत पथरगाडामा प्रदर्शन गरिएको हो ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |