दाईजो विवादको त्रासदी : विवाहपश्चात दुई महिनामै नवविवाहिताको मृत्यु

राजविराज । दाईजो प्रथा अझै पनि मधेसका धेरै घर–परिवारमा घातक बन्ने गरेको छ । त्यसको पछिल्लो उदाहरण सप्तरीको महदेवा गाउँपालिका–१ सोनरा टोलमा देखिएको छ, जहाँ विवाह भएको दुई महिनामै २१ वर्षीया नवविवाहिता महिलाले ज्यान गुमाउनुपर्‍यो ।

शनिबार बिरामी भएको भन्दै अस्पताल पुर्याइएकी दिपा कुमारी यादवलाई चिकित्सकले मृत घोषित गरेका थिए । तर, उनको शरीरमा देखिएका चोटपटक र निलडामले मृत्यु शंकास्पद रहेको प्रहरीको भनाइ छ ।

दिपाकी काका भगवती यादवका अनुसार विवाहलगत्तै दाईजोको विषयमा निरन्तर विवाद हुँदै आएको थियो । दिपाले पटक–पटक मानसिक र शारीरिक यातना सहनु परेको र घटनाको अघिल्लो दिन पनि कुटपिट भएको आरोप लगाइएको छ ।

दुई महिनाअघि मात्र दिपाको दिपककुमार यादवसँग सामाजिक परम्परागतका साथ विवाह भएको थियो । तर, दाईजो प्रथामा हुने अव्यावहारिक अपेक्षाका कारण सुखद दाम्पत्य जीवन सुरु हुनुअघि नै उनको जीवन अन्त्य भएको मृतकका आफन्तको दाबी छ ।

सप्तरी प्रहरीले यस घटनामा मृतककी पति र ससुरालाई नियन्त्रणमा लिएको छ । प्रहरीले थप अनुसन्धान अघि बढाइरहेको जनाएको छ ।

दाईजो प्रथा रोक्न कानुनी व्यवस्था भए पनि व्यवहारमा अझै पनि मधेसका विभिन्न क्षेत्रमा यसकै कारण महिलाहरू पीडित बन्नुपर्ने स्थिति दोहोरिँदो देखिन्छ ।