चन्दन यादब 
राजबिराज । सङ्घीय लोकतान्त्रिक मोर्चाले बुधबार राजबिराजमा वर्तमान राजनीतिक अवस्थाबारे जनजागरण अभियान सञ्चालन गरेको छ । कार्यक्रममा मोर्चामा आबद्ध विभिन्न दलका शीर्ष नेताहरूले सम्बोधन गर्दै मधेश, पहिचान, अधिकार र भूमि विधेयकका विषयमा सरकारमाथि तीव्र प्रहार गरेका छन् ।
कार्यक्रमलाई सम्बोधन गर्दै जनता समाजवादी पार्टी (जसपा) नेपालका अध्यक्ष उपेन्द्र यादवले कुनै समय एउटै पार्टीमा रहेका नेताहरू अहिले अलग-अलग भए पनि फेरि उत्पीडित समुदायको हक अधिकारका लागि मोर्चा बनाउनुपरेको बताए । उनले देशलाई वनजंगल मुक्त बनाउने नाममा ल्याइएको भूमि ऐन राष्ट्रविरोधी भएको दाबी गर्दै “जससँग लडेर अधिकार लिनुपर्ने उसकै पछि लागेपछि अधिकार पाउने सम्भावना हुँदैन,” भने ।
त्यसैगरी, लोकतान्त्रिक समाजवादी पार्टी (लोसपा) नेपालका अध्यक्ष महन्थ ठाकुरले पहिचान र अधिकारका लागि संघर्ष गर्ने योद्धामाथि झुठा मुद्दा लगाई जेलमा राख्नु सरकारको चरित्र भएको बताए । उनले “राजा फालेर गणतन्त्र ल्याउनु उपलब्धि भए पनि हैजा फैलिनु, खानेपानी अभाव हुनु र किसानलाई बेवास्ता गर्नु सरकारको लापरवाही हो,” भन्दै आलोचना गरे ।
राष्ट्रिय मुक्ति पार्टी नेपालका अध्यक्ष राजेन्द्र महतोले आदिवासी जनजाति र मधेसीहरू राज्यविहीन भएर बाँच्न बाध्य भएको बताए भने जनता प्रगतिशील पार्टी नेपालका अध्यक्ष हृदयेश त्रिपाठीले “देश हाम्रो हो, त्यसैले राज्य पनि हाम्रो हुनुपर्छ,” भन्ने धारणा राखे ।
तमलाेपा केन्द्रीय अध्यक्ष बृषेश चन्द्र लालले लोकतान्त्रिक मोर्चालाई बलियो बनाउन जोड दिँदै गौर घटनालाई राजनीतिक तरिकाले समाधान गर्नुपर्ने बताए । उनले संविधान संशोधनमार्फत समावेशीताको ग्यारेन्टी, पूर्ण समानुपातिक निर्वाचन प्रणाली र अधिकार सुनिश्चित गर्नुपर्नेमा जोड दिए ।
कार्यक्रममा जसपा नेपाल सप्तरी अध्यक्ष केदार यादवले भूमि विधेयक अगाडि बढाउने वा गौर घटनामा उपेन्द्र यादवलाई फसाउने षड्यन्त्र गरिए आन्दोलनमा उत्रिने चेतावनी दिए ।
नेताहरूले भूमि विधेयकलाई राष्ट्रविरोधी संज्ञा दिँदै यसैको बहानामा जसपा अध्यक्षमाथि छानबिन गर्न सरकारकै इसारामा परमादेश जारी गरिएको दाबी गरे । उनीहरूले यस्तो कदम स्वीकार्य नहुने भन्दै देशलाई चौथो मधेश आन्दोलनतर्फ धकेलिएको आरोप लगाए ।
कार्यक्रम राष्ट्रिय मुक्ति मोर्चाका सप्तरी अध्यक्ष दिपेन्द्र चौधरीको अध्यक्षतामा सम्पन्न भएको थियो । कार्यक्रममा लोसपा नेपालका महासचिव विनोद सिंहले स्वागत मन्तव्य राखेका थिए भने सञ्चालन राष्ट्रिय मुक्ति मोर्चाका केन्द्रीय सहमहासचिव गजेन्द्र मण्डलले गरेका थिए ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |