चन्दन यादब 
राजविराज । जेनजी आन्दोलनका क्रममा राजविराजका विभिन्न पार्टी कार्यालय र सरकारी कार्यालयमा आगजनी तथा तोडफोड गरिएको छ ।
प्रदर्शनकारीहरूले कार्यालयहरूमा आगजनी गर्नेक्रममा अदालत, नापी कार्यालय र राजविराज नगरपालिकाका महत्त्वपूर्ण कागजातहरू समेत जलेर नष्ट भएका छन्। सप्तरी सदरमुकाम राजविराजस्थित नेकपा एमाले, नेपाली काँग्रेस, जनमत पार्टी र जसपा नेपालका कार्यालयमा तोडफोड तथा आगजनी भएपछि स्थिति अत्यन्त तनावपूर्ण बनेको थियो ।
स्थिती नियन्त्रण बाहिर गएपछि जिल्ला प्रशासन कार्यालयले दिउँसो ३ः३० बजेदेखि राजविराज नगरपालिका र सोसँग जोडिएको विष्णुपुर गाउँपालिकाका केही क्षेत्रमा अर्को आदेश नभएसम्मका लागि कर्फ्यु आदेश जारी गरेको हो।
प्रदर्शनकारीहरूले जिल्लास्थित विभिन्न कार्यालय र गाडीहरूमा पनि आगजनी गरेका छन्। जिल्ला समन्वय समितिको कार्यालयमा राखिएका एक बस र एक पिकअप भ्यान, राजविराज नगरपालिकामा रहेको बारुणयन्त्र १, ट्र्याक्टर ४, स्कारपियो १, टिपर ३ र अन्य दुई वटा सवारी साधन जलेर नष्ट भएका छन्।
त्यस्तै, सघन शहरी विकास कार्यालयमा ६ वटा पिकअप भ्यान र ७ वटा मोटरसाइकल, सप्तरी जिल्ला अदालतमा २ वटा स्कारपियो र ४ वटा कारमा आगजनी गरिएको छ। नापी कार्यालयमा रहेको १ वटा स्कारपियो र १ वटा मोटरसाइकलसहित सबै गाडी जलेर पूर्ण रूपमा नष्ट भएको जिल्ला प्रहरी कार्यालय सप्तरीका डीएसपी जितेन्द्र कुमार बस्तेतले जानकारी दिएका छन्।
वन डिभिजन कार्यालयका सम्पूर्ण सामान बाहिर निकालेर आगजनी गर्नुका साथै उच्च अदालत जनकपुर, राजविराज इजलासमा समेत आगजनी गरिएको छ। सप्तरी जिल्ला अदालतमा भएको आगजनीबाट करिब एक दर्जन सरकारी तथा निजी मोटरसाइकल जलेर नष्ट भएका छन्।
यसबाहेक, पूर्व सिंचाई मन्त्री उमेश यादवको घरमा ढुंगामुढा तथा उहाँको स्कारपियोमा तोडफोड गरिएको छ भने नेपाल पत्रकार महासंघ, सप्तरी शाखाको भवनमा समेत तोडफोड भएको छ।
दिनभर तनावग्रस्त बनेको राजविराजमा यो घटनाले इतिहासकै सबैभन्दा ठूलो भौतिक क्षति पुर्याएको मानिएको छ। घटनाक्रममा तीन जना प्रहरी घाइते भएका छन्।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |