राजबिराज कारागारवाट फरार ३७ जना कैदी पक्राउ

राजबिराज । सप्तरी कारागारबाट फरार भएका कैदीमध्ये ३७ जनालाई प्रहरीले पक्राउ गरेको छ ।

बुधबार कारागारको मुख्य गेट तोडी ३ सय ९७ कैदीमध्ये २ सय ५ जना फरार भएका थिए । प्रहरीले जिल्लाका विभिन्न स्थानबाट ३७ जनालाई नियन्त्रणमा लिएको छ भने झुम्का कारागार, सुनसरीबाट फरार भएका ५ जना समेत गरी हालसम्म ४२ जना पक्राउ परेका छन् ।

अहिलेसम्म राजबिराज कारागारका १ सय ६८ जना कैदी अझै फरार रहेका र उनीहरूको खोजी तीव्र रुपमा भइरहेको जिल्ला प्रहरी उपरीक्षक गौतमकुमार केसीले जानकारी दिएका छन् । उनका अनुसार भारतको बिहार राज्यसँग जोडिएको कुनौली–सखडा सीमा नाका बन्द गरी खोजी अभियानलाई थप सक्रिय बनाइएको छ ।

यसअघि राजबिराजका विभिन्न कार्यालयमा आगजनी भएपछि जिल्ला प्रशासन कार्यालयले कर्फ्यु आदेश जारी गरेको थियो । नेपाली सेना परिचालन भएसँगै बिहीबारदेखि राजबिराजको अवस्था सामान्य बनेको छ ।