जितिया पर्वको विधिवत् सुरुवात, पोखरी सफाइ गरेर आशिया पार्टी प्यालेसको सहयोग

राजविराज । सन्तानको दीर्घायु र परिवारको कल्याणको कामना गर्दै तराई–मधेशमा शनिवारदेखि कठोर धार्मिक पर्व जितिया विधिवत् रूपमा सुरु भएको छ ।

परापूर्वकालदेखि मनाइँदै आएको यो पर्वको पहिलो दिन नहा–खा (नुहाएर खाने) विधिबाट प्रारम्भ हुन्छ । ब्रतालु महिलाले पोखरी वा जलाशयमा स्नान गरी भगवान् जितवाहन र पितृलाई घिरौलाको पातमा च्यूरा, दही, तेल र पिना चढाउँछन् । यसरी अर्पण गरिएको प्रसाद आफन्तसँग बाँडेर खाने र घाटमा चढाइएको तेल टाउकोमा लगाउने परम्परा रहेको छ ।

पहिलो दिन पूजापछि माछ–मरुवा (कोदोको रोटी, नोनीको साग र माछा) खाने चलन पनि विद्यमान छ । दोस्रो दिन अर्थात् आइतवार बिहान काग कराउनु अघि नै व्रती महिलाले ओंगठन (च्यूरा–दही सेवन) गरेपछि निराहार र निर्जल उपवासको क्रम सुरु हुन्छ । यो उपवास सोमबार बिहान ६:५५ बजे सम्पन्न हुने पण्डित आचार्य राजीव झाले जानकारी दिएका छन् ।

यसैबीच, राजविराज नगरपालिका–११ स्थित पोखरी तथा घाटमा आशिया पार्टी प्यालेसले सरसफाइ कार्य सम्पन्न गरेको छ । व्रतालु महिलालाई सहज वातावरण उपलब्ध गराउन पोखरी सफा गरी घेरा हालिएको र लुगा फेर्ने स्थानको व्यवस्था गरिएको प्यालेसका सञ्चालक अकबर हुसेनले बताए ।

हुसेनका अनुसार, “हजारौं महिला वर्षौंदेखि यस पोखरीमा नुहाएर पूजा गर्दै आएका छन् तर वातावरण प्रदूषित भएको देख्दा राम्रो लागेन । त्यसैले सामाजिक सद्भाव कायम होस् भन्ने उद्देश्यले सफाइ र घेराबेरा गरेर सुविधा उपलब्ध गराइएक हो ।”

गत वर्ष पनि उनले आफ्नै लगानीमा पोखरी सफाइ तथा व्यवस्थापन कार्य गरेर ब्रतालु महिलालाई सहयोग पुर्‍याएको उल्लेख छ ।