चन्दन यादब 
राजबिराज । जेनजी आन्दोलनका क्रममा कार्यालयबाट लुटिएका र चोरी गरिएका सामग्री फिर्ता गर्न राजबिराज नगरपालिकाले अपिल गरेको छ ।
नगरपालिकाले सोमबार प्रमुख प्रशासकीय अधिकृत हरिकिशोर प्रसाद चन्द्रवंशीद्वारा जारी सूचनामा, गत मंगलबारको प्रदर्शनका क्रममा केही व्यक्तिले ल्यापटप, ट्याब, प्रिन्टर, स्क्यानर, विद्युतिय सामग्रीलगायतका उपकरण लुटिएको वा चोरी भएको जनाएको हो ।
नगरपालिकाले घटनाका क्रममा संलग्न व्यक्तिहरूको फोटो र भिडियो सीसी क्यामरामा कैद भएको र सामाजिक सञ्जालमार्फत सार्वजनिक भइसकेको भन्दै तत्काल सम्पत्ति फिर्ता गर्न आग्रह गरेको छ ।
नगरप्रमुख इसरत परविनले जनताकै करबाट निर्माण भएका संरचना र सार्वजनिक सम्पत्तिहरू वार्ड कार्यालय, एम्बुलेन्स, फोहोर उठाउने टिपर, ट्रयाक्टरसम्म नष्ट भएको उल्लेख गर्दै, विगत छ दिनदेखि फोहोर नउठ्दा नगर दुर्गन्धित बन्दै गएको बताइन् ।
यसैबीच, कार्यवाहक नगरप्रमुख परविनको अध्यक्षतामा बसेको बैठकले मंगलबारदेखि विशेष सरसफाइ अभियान सञ्चालन गर्ने निर्णय गरेको छ ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |