सप्तरीका जेनजी पुस्ताद्वारा १० बुँदे ज्ञापनपत्र प्रधानमन्त्रीलाई प्रेषण

राजविराज । हालै देशव्यापी रूपमा चलेको जेनजी आन्दोलनका क्रममा सहादत प्राप्त सहिदप्रति श्रद्धाञ्जली अर्पण गर्दै र घाइतेहरूको स्वास्थ्य लाभको कामना गर्दै जेनजी पुस्ताले १० बुँदे मागसमेत राख्दै ज्ञापनपत्र प्रधानमन्त्री तथा मन्त्रिपरिषद्को कार्यालयमा बुझाएका छन् ।

सप्तरी जिल्ला प्रशासन कार्यालयमार्फत बुझाइएको उक्त ज्ञापनपत्रमा प्रत्यक्ष निर्वाचित प्रधानमन्त्रीलाई कार्यकारी प्रमुख बनाउनुपर्ने, प्रदेशसभा खारेज गर्नुपर्ने र स्थानीय तहको निर्वाचन गैरदलीय आधारमा हुनुपर्ने माग गरिएको छ । त्यस्तै, २०४७ सालपछि सार्वजनिक पद धारण गरेका व्यक्तिहरुको सम्पत्ति छानबिन गरी अकूत सम्पत्ति राष्ट्रियकरण गर्नुपर्ने उल्लेख छ ।

आन्दोलनका क्रममा भएका घटनाको उच्चस्तरीय छानबिन गरी तत्कालीन सरकारका जिम्मेवारमाथि कारबाही गर्नुपर्ने तर आन्दोलनकारीलाई कारबाही नगर्नुपर्ने मागसमेत राखिएको छ । संवैधानिक निकायमा नियुक्ति प्रतिस्पर्धाका आधारमा गर्नुपर्ने, सांसदहरूले मन्त्री बन्न नपाउने र प्रधानमन्त्रीले विज्ञ छनोट गरी समानुपातिक समावेशी आधारमा मन्त्रिपरिषद गठन गर्नुपर्ने प्रावधान गर्नुपर्ने भनिएको छ ।

यस्तै, विद्यार्थी सङ्घ (स्ववियु) निर्वाचन भातृ संगठनविहीन बनाउनुपर्ने, संसद भवन र सिंहदरबारलाई जेनजी संग्रहालयमा परिणत गर्नुपर्ने तथा संविधान संशोधनमार्फत प्रत्यक्ष निर्वाचित प्रधानमन्त्रीको व्यवस्था तत्काल लागू गर्नुपर्ने माग पनि ज्ञापनपत्रमा समेटिएका छन् ।

जेनजी पुस्ताले यो ज्ञापनपत्रलाई आन्दोलनका मागहरूको आधिकारिक अभिव्यक्ति भन्दै सरकारलाई तत्काल सम्बोधन गर्न आग्रह गरेको छ ।