घटस्थापनासँगै रम्पुरा मल्हनिया बोर्डरमा कलश यात्रा, दुर्गा मन्दिरमा झिलिमिली

सप्तरी । बडादशैँ अर्थात् दशहरा पर्वको प्रारम्भसँगै सप्तरीको हनुमाननगर कंकालनी नगरपालिका–१४ स्थित रम्पुरा मल्हनिया, बोर्डरमा सोमबार बृहत् कलश यात्रासहित दुर्गा पूजा भव्य रूपमा सुरु गरिएको छ ।

वडा अध्यक्ष कृष्णकुमार यादवको अगुवाइमा निकालिएको कलश यात्रा नगरको रम्पुरा, मल्हनियाँ हुँदै डलवाको कोशी तटबन्धमा पुगेर कलश भर्ने र पुनः दुर्गा मन्दिरमा स्थापना गर्ने परम्पराअनुरूप सम्पन्न गरिएको हो ।

कलश यात्रासँगै बोडरमा रामलिला, प्रवचन, मेला तथा विभिन्न सांस्कृतिक–मनोरञ्जनात्मक कार्यक्रमको पनि आयोजना गरिएको आयोजक समितिका मनिषकुमार यादवले जानकारी दिए ।

शारदीय नवरात्र अर्थात् बडादशैँको पहिलो दिन घटस्थापनासँगै सप्तरीका दुर्गा मन्दिरहरू फूलमालाले सजाइएका छन् । गाउँ–गाउँमा दुर्गा भगवतीको कलात्मक मूर्ति स्थापना गर्दै पूजा आराधना सुरु भएको छ । विशेषगरी सप्तमी र अष्टमीका दिन ठूलो संख्यामा भक्तजनहरूको भीड हुने भएकाले स्थानीय प्रशासनले कुनौली, रम्पुरा, मल्हनियाँलगायत क्षेत्रमा सुरक्षा सतर्कता बढाएको छ ।

मन्दिरमा भक्तजनलाई सहजता मिलोस् भन्ने उद्देश्यले स्वयंसेवक परिचालन गरिएको छ । यसैक्रममा मन्दिरमा पूजासँगै पण्डित रामकुमार शास्त्रीद्वारा भजन–सन्ध्याको विशेष कार्यक्रम पनि आयोजना हुने भएको छ ।

दशहरा प्रारम्भसँगै राजविराज, हनुमाननगर, भारदह, डाक्नेश्वरी पातो लगायतका बजार क्षेत्रहरूमा सर्वसाधारणको चहलपहल उल्लेख्य रूपमा बढेको देखिएको छ ।