देव महासम्मेलन राजबिराजमा सुरु

राजबिराज । देव समुदायको उत्थान र सामाजिक कुरीति–विकृति अन्त्य गर्ने उद्देश्यले राजबिराजमा अन्तर्राष्ट्रिय देव महासम्मेलन भव्य समारोहका बीच शुक्रबार उद्घाटन गरिएको छ ।

राजबिराज वडा नं. ६ स्थित बागेश्वरी मन्दिर परिसरमा आयोजित समारोहमा पूर्वमुख्यन्यायाधीश कमानन्द देवले महासम्मेलनको उद्घाटन गरेका हुन् ।

सो अवसरमा प्रमुख अतिथि पूर्वमुख्यन्यायाधीश देवले देव समुदायको पहिचान संरक्षण, इतिहास निर्माण, संस्थाबीचको समन्वय, सहकार्य र एकता कायम गर्न आवश्यक रहेकोमा जोड दिए ।

महासम्मेलनका संयोजक इन्जिनियर इन्द्र नारायण देवले देव समुदायभित्र देखिएका बहुविवाह, अन्तरजातीय तथा समलैंगिक विवाह, दाइजो प्रथा जस्ता सामाजिक विकृति न्यूनिकरण गर्नुपर्ने आवश्यकता औंल्याए। साथै उनले संस्कारगत क्रियाकलापमा समयानुकूल परिवर्तन र सुधार गर्दै समुदायको उत्थानमा सबै जुट्नुपर्नेमा जोड दिए ।

महासम्मेलन इन्जिनियर इन्द्र नारायण देवको अध्यक्षतामा सम्पन्न भएको थियो । कार्यक्रममा पूर्वमन्त्री जितेन्द्र नारायण देव, पूर्वउपसभामुख उपमा देव, सह–संयोजक इन्द्र कुमार देव, विराट देव सेवा समिति अध्यक्ष राजेन्द्र प्रसाद देव, झापाका चिरञ्जिवी प्रसाद देव, काठमाडौं देव समाजका महेश प्रसाद चौधरी र ध्रुव देव, मटयाहनी मुखिया प्रदीप देव, गुढी संस्थान निर्देशक नारायण चौधरी, सेभद सप्तरीका ध्रुव प्रसाद देव, सल्लाहकार डा. कमानन्द देव, भवानी सेवा समितिका प्रताप नारायण चौधरी, राजबिराज वडा नं. १३ का अध्यक्ष त्रिलोकिनाथ चौधरी, वडा नं. १६ का अध्यक्ष रामएकवाल यादवसहित नेपालका विभिन्न स्थान र भारतको बिहारबाट आएका देव समुदायका प्रतिनिधिहरूको सहभागिता रहेको थियो ।

अन्तर्राष्ट्रिय देव महासम्मेलन तीन दिनसम्म चल्ने कार्यक्रम रहेको आयोजक समितिले जनाएको छ ।