बरसाईनमा बन्द गरिएको मेला पुनः सञ्चालन भएको भन्दै जेनजी युवाको आपत्ति

राजविराज । बोदेबरसाइन नगरपालिका–५ स्थित बरसाइनमा जिल्ला प्रशासन कार्यालयले बन्द गर्ने निर्णय गरे पनि पुनः मेला सञ्चालन गरिएको भन्दै जेनजी समूह र स्थानीय युवाहरूले कडा आपत्ति जनाएका छन् ।

सोमबार नेपाल पत्रकार महासंघ सप्तरीमा आयोजित पत्रकार सम्मेलनमा जेनजीका प्रतिनिधि र युवाहरूले महोत्सवको नाममा समाजमा अश्लील गीत, नृत्य र प्रदर्शन भइरहेको भन्दै तत्काल रोक लगाउन माग गरेका हुन् । उनीहरूले यस्ता गतिविधिले सामाजिक वातावरणलाई बिगार्ने र समाजमा विकृति फैलाउने कार्य भइरहेको आरोप लगाए ।

पत्रकार सम्मेलनमा बोदेबरसाइन युवा तथा सप्तरी उद्योग वाणिज्य संघका सदस्य सुरेन्द्र प्रसाद साहले महोत्सवका नाममा गरिएका अश्लील प्रदर्शनले नगरमा विकृति फैलाएको बताउँदै भने, “व्यापारिक रूपमा कुनै लाभ नभएका यस्ता महोत्सव केही सीमित व्यक्तिहरूको स्वार्थका लागि मात्रै सञ्चालन भइरहेका छन् । यदि यस्ता महोत्सव बन्द नगरिए, हामी चरणबद्ध आन्दोलनमा उत्रनेछौं ।”

उनले थपे, “स्थानीय कृषि उत्पादन, कला, संस्कृति, धर्म र परम्परालाई झल्काउने प्रस्तुति तथा स्थानीय कलाकार र व्यापारीको सहभागिता नदेखाई, बरु अश्लीलता प्रोत्साहन गरिएको छ। यस्तो विकृति फैलाउने कार्य तुरुन्त रोक्नुपर्छ ।”

यसअघि असोज १२ देखि २७ गतेसम्मका लागि दुर्गा पूजा मेला सञ्चालनको अनुमति दिइएको थियो । तर, अनुमति विपरीत महोत्सवमा अश्लील प्रदर्शन र अशोभनीय गतिविधि भएको भन्दै जिल्ला प्रशासन कार्यालयले असोज २४ गतेदेखि मेला बन्द गर्न निर्देशन जारी गरेको थियो ।

मेला बन्द गर्ने निर्णयपछि पनि आयोजकहरूले महोत्सवलाई निरन्तरता दिई दुर्गा पूजाको नाम परिवर्तन गरी “श्री बोदेबरसाइन महोत्सव” सञ्चालन गरेको आरोप युवाहरूले लगाएका छन् ।

जिल्ला प्रशासन कार्यालयका प्रशासकीय अधिकृत जितेन्द्र पासवानका अनुसार, “अनुमति अवधिभन्दा अगावै मेला सञ्चालनमा आएका कारण प्रशासनले मेला बन्द गराएको थियो।”

जेनजीका अगुवा पुष्पेन्द्र साहका अनुसार, जसपाका नेतृ बब्बी सिंह यादवले सयौं जनतालाई प्रलोभन देखाई प्रशासनबाट अनुमति लिन प्रयास गरे पनि अनुमति नपाई असोज २५ गतेदेखि पुनः मेला सञ्चालन गरेको बताइएको छ ।

पत्रकार सम्मेलनमा बोदेबरसाइन युवा तथा उद्योग वाणिज्य संघका सदस्य सुरेन्द्र प्रसाद साह, युवा अगुवा राजकिशोर यादव, पुष्पेन्द्र साह, राजु यादव, ओमप्रकाश यादव, बैधनाथ यादवलगायतको उपस्थिति थियो ।