तलबको माग गर्दै अग्नीसाइर गाउँपालिकामा तालाबन्दी, सेवा प्रवाह ठप्प

राजविराज । सप्तरीको अग्नीसाइर कृष्णासवरन गाउँपालिकाका शिक्षक तथा कर्मचारीहरूले तलब भत्ता नपाएको भन्दै मंगलबार गाउँपालिका कार्यालय र वडा कार्यालयहरूमा तालाबन्दी गरेका छन् ।

प्रदर्शनकारीहरूले गाउँपालिकाको मुख्य गेट, अध्यक्ष र उपाध्यक्षको कार्यकक्षसहित सबै शाखा तथा ६ वटै वडा कार्यालयमा ताला लगाएका छन् । तालाबन्दीपछि कर्मचारीहरू विभिन्न वडा कार्यालयमा धर्नामा बसेका छन् ।

माध्यमिक विद्यालय जण्डोलका प्रधानाध्यापक कामेश्वर मण्डलका अनुसार तलब भत्ता माग गर्दै पटक–पटक ध्यानाकर्षण गराउँदा पनि सम्बोधन नभएपछि तालाबन्दीसहितको आन्दोलनमा उत्रिनु परेको हो ।

“तलब सुनिश्चित नभएसम्म संघर्षका कार्यक्रम जारी रहनेछ,” मण्डलले चेतावनी दिँदै भने, “तिहारअघि माग सम्बोधन नभए छठपछाडि विद्यालय, स्वास्थ्य संस्था लगायतका सबै कार्यालय बन्द गर्दै सशक्त आन्दोलनमा उत्रिन्छौं ।”

तालाबन्दी र धर्नाका कारण गाउँपालिका तथा वडा कार्यालयबाट प्रदान हुने सबै सेवा ठप्प भएको छ, जसले सेवाग्राहीहरूलाई ठूलो असहजता भएको छ ।

गाउँपालिका अध्यक्ष दिनानाथ चौधरी, उपाध्यक्ष कल्पना कुमारी चौधरी र ६ वटै वडा अध्यक्षलाई बुझाइएको ज्ञापनपत्रमा आन्दोलनका कारण सिर्जित सम्पूर्ण क्षतिको जिम्मेवारी गाउँपालिका प्रशासनले लिनुपर्ने उल्लेख गरिएको छ ।