बोदेबरसाईनमा अज्ञात व्यक्तिद्वारा गोली प्रहार, मन्दिरका पुजारीको मृत्यु

राजबिराज । सप्तरीको बोदेबरसाईन नगरपालिका–८ रजकपट्टीस्थित कबिर बाबा मन्दिरका पुजारीको अज्ञात व्यक्तिद्वारा गरिएको गोली प्रहारबाट मृत्यु भएको छ ।

शनिबार राति करिब २ः१५ बजे मन्दिरका ७० वर्षीय पुजारी रामदुलार साहमाथि अज्ञात व्यक्तिले गोली प्रहार गरेको जिल्ला प्रहरी कार्यालय सप्तरीका प्रहरी उपरीक्षक गौतमकुमार केसीले जानकारी दिए ।

लामो समयदेखि मन्दिरमा एक्लै बस्दै आएका पुजारी साह कुट्टी अगाडिको बाटोमा अज्ञात व्यक्तिले गोली हानेको बताइएको छ । गोली लागेर घटनास्थलमै उनको मृत्यु भएको प्रहरीले पुष्टि गरेको छ ।

घटनापछि जिल्ला प्रहरी कार्यालय र इलाका प्रहरी कार्यालयको टोली घटनास्थलमा पुगेर अनुसन्धान सुरु गरेको छ । गोली प्रहारको कारण र संलग्न व्यक्तिहरूको पहिचानका लागि प्रहरीले अनुसन्धान अघि बढाएको छ । मन्दिर परिसरमा भएको घटनाले स्थानीय बासिन्दा त्रसित बनेका छन्।