राजविराज–हनुमाननगर सडक मर्मतको माग, स्थानीयद्वारा चक्का जाम

 राजविराज । राजविराज–हनुमाननगर सडकखण्डअन्तर्गत तोपा क्षेत्रमा सडक मर्मतको माग गर्दै स्थानीयवासीहरूले चक्का जाम गरेका छन् ।

सडक नबन्दा राजविराजदेखि हनुमाननगरसम्मको यात्रा अत्यन्तै जोखिमपूर्ण र कष्टकर बनेको स्थानीयहरूको गुनासो छ । दयनीय अवस्थामा पुगेको सडकले जनजीवन प्रभावित बनाएको छ भने धुलोका कारण सर्वसाधारण स्वास्थ्यसम्बन्धी समस्यामा परेका छन् ।

सडकभरि खाल्डाखुल्डी र बाक्लो धुलोका कारण दैनिक आवतजावतमा समस्या भइरहेको स्थानीय युवा भगवानलाल यादवले जानकारी दिए । उनका अनुसार, सडक निर्माण नहुँदा यातायात अवरुद्ध हुनुका साथै सवारी साधन बिग्रने समस्या समेत उत्पन्न भएको छ ।

सडक मर्मतको माग गर्दै स्थानीयवासीहरूले चक्का जाम गर्दै सम्बन्धित निकायलाई तत्काल सुधारात्मक कदम चाल्न आग्रह गरेका छन् ।