सप्तरीको सकरपुरामा चारदिने मेला सुरु, डा. राउतले गरे उद्घाटन

राजविराज । जनमत पार्टीका राष्ट्रिय अध्यक्ष तथा प्रतिनिधि सभा सदस्य डा. सिके राउतले शनिबार सप्तरीको तिलाठी–कोइलाडी गाउँपालिका–३, सकरपुरामा आयोजित मेला’ पुजाको उद्घाटन गरेका छन् ।

डा. राउतले रिबन काटी मेलाको औपचारिक शुभारम्भ गरेका थिए । सो अवसरमा लक्ष्मी तथा छठ पूजा समितिका संयोजक उग्रकान्त झा र अध्यक्ष शिवकुमार मण्डलले प्रमुख अतिथि डा. राउतसहितका अन्य अतिथिहरूलाई गम्छा ओढाएर स्वागत गरेका थिए ।

२५ वर्षअघिसम्म नियमितरूपमा आयोजना हुँदै आएको ‘कार्तिक–कुमार मेला’ लामो समयदेखि स्थगित रहेकाले यसपटक स्थानीयको पहलमा पुनः सुरु गरिएको हो । स्थानीय संस्कृतिको संरक्षण र पुनर्जीवनका उद्देश्यले मेला आयोजना गरिएको बताइएको छ ।

उद्घाटनपछि प्रमुख अतिथि डा. राउतले मेलास्थलमा निर्माण गरिएको मूर्तिको पूजा–दर्शन गर्दै मेलाको अवलोकनसमेत गरेका थिए । उनले स्थानीय संस्कृतिको जगेर्ना र सामाजिक एकता प्रवर्द्धनमा यस्ता कार्यक्रमले महत्वपूर्ण भूमिका खेल्ने बताएका थिए ।

कार्यक्रममा जनमत पार्टीका उपाध्यक्ष डा. जयकान्त राउत, मधेश प्रदेशका मन्त्री महेशप्रसाद यादव, सांसद सकिल अली, जनमत पार्टी सप्तरी अध्यक्ष रामगमन साह, स्थानीय नेता गुडु सिंह लगायतका राजनीतिक दलका प्रतिनिधि र स्थानीय बासिन्दाहरूको उल्लेखनीय उपस्थिति रहेको थियो ।

कार्तिक ८ देखि ११ गतेसम्म चल्ने यो चारदिने मेलामा देवी–देउताको नियमित पूजा, स्थानीय कलाकारहरूको सहभागितामा नाटक, सांस्कृतिक कार्यक्रम तथा अन्तिम दिन मूर्ति विसर्जनसहित समापन हुने संयोजक झाले जानकारी दिए ।

मेलाको उद्देश्य गाउँस्तरमा युवाहरूको व्यक्तित्व विकास, भाषणकला अभिवृद्धि र मनोरञ्जन प्रदान गर्नु रहेको समितिका उपाध्यक्ष अशोक मण्डलले बताए । स्थानीयको स्वेच्छा चन्दा र सहयोगबाट सञ्चालन हुने मेलामा करिब पाँच लाख रुपैयाँ खर्च हुने अनुमान समितिका अगुवा भुषणकुमार सिंहले बताएका छन् ।