पातो सडकखण्ड निर्माणको माग गर्दै चक्का जाम

राजिवराज । पातो सडकखण्डको निर्माण कार्य तत्काल सम्पन्न गर्न माग गर्दै स्थानीयवासीहरूले आज चक्क जाम क्षेत्रमा सडक अवरुद्ध गरेका छन् ।

बुधबार बिहान अमरलती चौक व्यवस्थापन समितिको अगुवाइमा स्थानीयवासी र व्यवसायीहरूले संयुक्त रूपमा सडक अवरोध गर्दै आन्दोलन सुरु गरेका हुन् ।

स्थानीय प्रमोद यादवका अनुसार, वर्षौंअघि सडक खनेर अलपत्र छोडिएको र निर्माण कार्य अत्यन्त सुस्त गतिमा भइरहेको कारण स्थानीयवासीहरू आक्रोशित बनेका हुन् । उनले भने, “एक महिनाभित्र सडक कालोपत्रे गर्ने स्पष्ट प्रतिबद्धता नआएसम्म आन्दोलन जारी रहनेछ ।”

व्यवस्थापन समितिका अध्यक्ष दिकु यादवले १५ वर्षअघि सडक खनिएपछि हालसम्म पूर्ण निर्माण कार्य सम्पन्न नभएकाले जनजीवन कष्टकर बनेको बताए । उनका अनुसार, अधुरो सडकका कारण दुर्घटनाको जोखिम बढेको, धुलो र फोहरका कारण स्वास्थ्य समस्या गम्भीर बनेको र वातावरणसमेत प्रदूषित भएको छ ।

“निर्माण कम्पनी र सडक डिभिजन कार्यालयलाई पटक–पटक ध्यानाकर्षण गराउँदा पनि कुनै सुनुवाइ नभएपछि हामी संघर्षमा उत्रिन बाध्य भएका हौँ,” उनले भने ।

स्थानियहरूले बिहान साढे १० बजेदेखि सुरु गरेको सडक अवरोधका कारण सो सडक हुँदै चल्ने सम्पूर्ण सवारीसाधन ठप्प भएका छन् । सडकमा टायर बालेर र डेक्सबेन्च तेर्स्याएर गरिएको जाम साँझसम्म पनि जारी रहेको स्थानीयहरूले बताएका छन् ।

कठौना–पातो सडकखण्ड निर्माण कार्य १५ वर्षभन्दा बढी समयदेखि सुरु भए पनि अझै कालोपत्रेसहितका निर्माण कार्य पूरा हुन सकेको छैन । निर्माणमा ढिलासुस्तीका कारण सो मार्ग प्रयोग गर्ने यात्रु र सवारीसाधन दुबैलाई ठूलो समस्या हुँदै आएको छ ।