सांसद साहमाथि सासू–ससुराको आरोप : हामीलाई घरबाट निकालियो

राजविराज । मधेश प्रदेशमा जनता समाजवादी पार्टी नेपाल (जसपा) तर्फबाट समानुपातिक प्रतिनिधित्वमा प्रदेश सभा सदस्य रहेकी किरण कुमारी साहमाथि आफ्नै सासू–ससुरालाई घरबाट निकालेको आरोप लागेको छ ।

आर्थिक रूपमा सम्पन्न र शिक्षित परिवारमा देखिएको यो विवादको भिडियो हाल सामाजिक सञ्जालमा तीव्र रूपमा भाइरल बनेपछि घटनाले व्यापक चर्चा पाएको छ । भिडियोमा साहकी सासू–ससुराले आफूहरू छोराबुहारीबाट अपमान र तिरस्कार सहनु परेको भन्दै सार्वजनिक रूपमा गुनासो गरेका छन् ।

सासू–ससुराले सामाजिक सञ्जालमार्फत आफ्नो पीडा व्यक्त गर्दै सांसद साह र उनका श्रीमानले आफूहरूलाई घरबाट निकालेर असहज अवस्थामा पुर्‍याएको दाबी गरेका छन् । उनीहरूले आफ्ना बुहारी र छोराबाट पाएका व्यवहारले आफूहरू मानसिक र सामाजिक रूपमा आहत भएको बताएका छन् ।

यता सांसद किरण कुमारी साह र उनका परिवारको धारणा भने अहिलेसम्म सार्वजनिक भएको छैन । घटनाबारे जानकारी लिन पटक–पटक सम्पर्क गर्ने प्रयास गरे पनि सांसद साह र उनका परिवारका तर्फबाट कुनै प्रतिक्रिया प्राप्त हुन सकेको छैन ।

घटनाबारे स्थानीयबासीहरूबीच व्यापक चर्चा परिचर्चा भइरहेको छ । उनीहरूको भनाइमा जनप्रतिनिधि स्वयंले यस्ता व्यवहार गर्नु अत्यन्तै दुःखद र निन्दनीय कुरा हो । यस्तो घटना समाजका लागि पनि निकै दुर्भाग्यपूर्ण र नकारात्मक असर पार्ने खालको भएको उनीहरूको भनाइ छ ।