सेभ द सप्तरीको २६औं वार्षिक साधारण सभा सम्पन्न

राजविराज । सेभ द सप्तरीको २६औं वार्षिक साधारण सभा तथा सामाजिक लेखा परीक्षण सम्पन्न भएको छ । शुक्रबार आयोजित उक्त कार्यक्रममा जिल्ला समन्वय समिति सप्तरीका प्रमुख शिव नारायण साहले सभाको उद्घाटन गरेका थिए ।

उद्घाटन समारोहमा प्रमुख साहले संस्थाले सामाजिक उत्तरदायित्व वहन गर्दै जिल्लाको विकास, स्वरोजगार, गरिबी निवारण र शैक्षिक उत्थानका क्षेत्रमा खेलेको भूमिकाको प्रशंसा गरे ।

“संस्था नाफामुखी मात्र नभई सामाजिक उत्तरदायित्व निर्वाहमा पनि महत्वपूर्ण योगदान दिँदै आएको छ,” उनले भने, “फलस्वरूप सचेतनासँगै विपन्न समुदायको जीवनस्तरमा सुधार र तिनका सन्तानको शिक्षामा पहुँच वृद्धि भएको महसुस गर्न सकिन्छ ।”

सभामा अध्यक्षीय प्रतिवेदन प्रस्तुत गर्दै अध्यक्ष ध्रुव प्रसाद देवले संस्थाले स्थापना कालदेखि नै सामाजिक विकासका बहुआयामिक क्षेत्रमा विभिन्न सरकारी तथा राष्ट्रिय/अन्तर्राष्ट्रिय गैरसरकारी निकायहरूसँग सहकार्य र समन्वय गर्दै आएको बताए ।

उनका अनुसार सेभ द चिल्ड्रेन अन्तर्गतको समुन्नती कार्यक्रम, हेबिटाट फर ह्युम्यानिटी, वन हर्ट वर्ल्डवाइड, सफा परियोजना लगायतका संस्थाको सहयोगमा गत आर्थिक वर्ष २०८१/८२ मा करिब ७ करोड ८७ लाख २० हजार ८२४ रुपैयाँ बराबरका कार्यक्रमहरू सञ्चालन गरिएका थिए ।

हेबिटाट फर ह्युम्यानिटी नेपालको सहकार्यमा सञ्चालित सफा परियोजना अन्तर्गत खानेपानी परीक्षण, चर्पी निर्माण, ट्युबवेल जडान, बायोस्यान्ड फिल्टर वितरण तथा समुदायस्तरका जनचेतनामूलक कार्यक्रमहरू सञ्चालन भइरहेका छन् ।

गुणस्तरीय शिक्षामा टेवा पुर्‍याउने उद्देश्यका साथ “कसैलाई पछाडि नछोडौं” अभियान अन्तर्गत कक्षा ५ देखि १२ वर्ष उमेर समूहका विद्यालय बाहिर रहेका बालबालिकालाई लक्षित गरी छिनमस्ता गाउँपालिका र तिलाठी कोईलाडी गाउँपालिका (सप्तरी) तथा सम्सी र मटिहानी नगरपालिका (महोत्तरी) मा कार्यक्रमहरू सञ्चालन भइरहेको उनले बताए ।

सो अवसरमा बिष्णुपुर गाउँपालिका शाखा अधिकृत गंगाराम साह, वन हर्ट वर्ल्डवाइडका कार्यक्रम अधिकृत ओम नारायण झा, राजविराज स्वास्थ्य शाखा प्रमुख कामेश्वर यादव, छिनमस्ता गाउँपालिका महिला तथा बालबालिका शाखा प्रमुख संजन झा, बोरिया स्वास्थ्य चौकी प्रमुख फुलबाबु गुप्ता तथा राजविराज नगरपालिका कृषि शाखाका सुनिल यादवले शुभकामना मन्तव्य व्यक्त गरेका थिए ।

कार्यक्रममा संस्थाका निर्देशक सञ्जीव चौधरीले स्वागत मन्तव्य दिएका थिए भने सञ्चालन सबिर आजमले गरेका थिए ।