शहीद नागेश्वर यादवको स्मृतिमा रूपनीमा १०औँ स्मृति सभा सम्पन्न

राजविराज । मधेश आन्दोलनका शहीद नागेश्वर यादवको सम्झनामा १०औँ स्मृति सभा एक कार्यक्रमका बीच मनाइएको छ ।रूपनी गाउँपालिका–४ स्थित छपकी टोलमा शुक्रबार नागेश्वर यादवको सम्झनामा स्मृति सभा आयोजना गरिएको हो ।

मधेश आन्दोलनका क्रममा २०७२ मंसिर ५ गते रूपनीमा प्रहरी र आन्दोलनकारीबीच भएको झडपकै दौरान गोली लागेर नागेश्वर यादवको मृत्यु भएको थियो ।

रूपनी गाउँपालिका अध्यक्ष तथा मधेश आन्दोलनका अगुवा दिनेश यादवले शहीद नागेश्वर यादवको समाधिस्थलमा पुष्प अर्पण गर्दै श्रद्धाञ्जली अर्पण गरेका छन् ।

राष्ट्रिय मुक्ती पार्टीका जिल्ला अध्यक्ष दिपेन्द्र चौधरीले २०७२ सालमा जारी संविधानलाई समावेशी बनाउन मधेशवादी दलले शान्तिपूर्ण आन्दोलन गरिरहेको बेला प्रहरीले अत्यधिक बल प्रयोग गर्दै नागेश्वरलाई ‘न्यायोचित चित्त’ ढङ्गले गोली हानेर हत्या गरेको आरोप लगाए ।

हाल शहीद नागेश्वर यादवकी पत्नी सुष्मा यादवलाई रूपनी गाउँपालिकाले कार्यालयमा ‘सामाजिक परिचालक’का रूपमा रोजगार प्रदान गरेको छ ।

श्रद्धाञ्जली कार्यक्रमलाई सम्बोधन गर्दै शहीद नागेश्वरका दाजु जुगेश्वर यादवले मधेशको अधिकार सुनिश्चित नहुँदासम्म र शहीदको सपना पूरा नहोउञ्जेल आन्दोलनको मुद्दाबाट पछि नहट्ने बताए ।

समाजसेवी बैरसु यादवको अध्यक्षतामा आयोजित सभामा जिल्ला समन्वय समितिका उपप्रमुख शंभु कुमार यादव, रूपनी गाउँपालिका पूर्व उपाध्यक्ष बेचनी सरदार, पूर्व वडा अध्यक्ष पिताम्वर यादव, जसपा जिल्ला सदस्य दिनेश यादव, लोसपा सचिव जय नारायण यादव, वडा नम्बर ४ का अध्यक्ष छेदी ईसर, स्थानीय नेता तेजनारायण यादव लगायतका वक्ताहरूले शहीदको सपनालाई व्यवहारमा उतार्नुपर्नेमा जोड दिए ।