नवीकरण नीतिविरुद्ध सप्तरीका औषधि व्यवसायीको कडा विरोध

राजविराज । नेपाल औषधि व्यवसायी संघ सप्तरीले औषधि ऐन २०३५ को दफा ११ उपदफा ५ खारेजीको माग गर्दै आइतबार राजविराजमा विरोध प्रदर्शन गरेको छ । केन्द्रीय चरणबद्ध आन्दोलन कार्यक्रमअन्तर्गत संघले एक घण्टा सम्पूर्ण औषधि पसल बन्द गरी शान्तिपूर्ण र्‍यालीसहित दबावमूलक प्रदर्शन गरेको हो ।

औषधि व्यवसायीहरूले नियामक व्यवस्थाप्रति असन्तुष्टि जनाउँदै आइतबार बिहान ११ बजेदेखि मध्यान्ह १२ बजेसम्म आफ्ना पसल बन्द गरी राजविराज नगरपालिकाभित्र र्‍यालीसहित विरोध प्रदर्शन गरेका थिए। संघले दफा ११(५) मा रहेको समयमै नवीकरण नगरे प्रमाणपत्र स्वतः खारेज हुने प्रावधानलाई व्यवसाय–मैत्री नठानिएको बताएको छ।

संघका अनुसार उक्त व्यवस्था लागू हुँदा दुर्गम क्षेत्रका व्यवसायी ठूलो मर्कामा पर्ने, सेवा प्रवाह अवरुद्ध हुने खतरा बढ्ने र सामान्य ढिलाइमै व्यवसाय अवैध हुने अवस्था सिर्जना हुने भएकाले यो प्रावधान तत्काल खारेज हुनुपर्ने उनीहरूको माग रहेको छ ।

नेपाल औषधि व्यवसायी संघले औषधि ऐनको उक्त उपदफा खारेजीको माग गर्दै मंसिर ११ गतेदेखि १६ गतेसम्म विभिन्न चरणबद्ध आन्दोलनका कार्यक्रम घोषणा गरेको छ । उक्त अवधिमा प्रदर्शनदेखि औषधि व्यवस्था विभागको कार्यालयमा धर्ना दिने कार्यक्रम समेत रहेको संघले जनाएको छ ।