साझा प्रकाशनको आयोजनामा राजविराजमा बृहत् पुस्तक प्रदर्शनी

राजविराज । सप्तरीको राजविराजमा बुधबारदेखि बृहत् पुस्तक प्रदर्शनी सुरु भएको छ । साहित्यिक संस्था साझा प्रकाशनले आफ्नो स्थापना दिवसको अवसरमा उक्त प्रदर्शनीको आयोजना गरेको हो ।

प्रदर्शनीको उद्घाटन आमसञ्चार प्राधिकरण मधेश प्रदेशका अध्यक्ष जितेन्द्र खडगाले एक कार्यक्रमबीच गरेका हुन् । उद्घाटन कार्यक्रममा बोल्दै खडगाले अहिलेको युगमा पुस्तक र पत्रपत्रिका किनेर पढ्ने पाठकको संख्या घट्दै गएकोप्रति चिन्ता व्यक्त गरे । वैकल्पिक सूचना र प्रविधिको बढ्दो प्रयोगसँगै परम्परागत माध्यमका पाठक घट्नु समाज र राष्ट्रका लागि पनि चिन्ताको विषय भएको उनले बताए ।

१५ दिनसम्म सञ्चालन हुने प्रदर्शनीमा साहित्य, संस्कृति, कला, इतिहास, धार्मिक ग्रन्थ, शब्दकोषलगायत विषयका २ हजार ६ सयभन्दा बढी शीर्षकका पुस्तकहरू राखिएको साझा प्रकाशनले जनाएको छ । करिब १ हजार ६ सयभन्दा बढी लेखकका कृतिहरू समेटिएको प्रदर्शनी पुष १ गतेसम्म चल्नेछ ।

प्रदर्शनी अवधिभर विभिन्न विधाका पुस्तकहरूमा २५ देखि ४० प्रतिशतसम्म छुटको व्यवस्था गरिएको आयोजकले जनाएको छ ।