राजविराजमा एआई साक्षरता बढाउन एकदिने क्षमता अभिवृद्धि कार्यक्रम

राजविराज । सप्तरीको राजविराजमा एआईको सुरक्षित र प्रभावकारी प्रयोग सम्बन्धी एकदिने तालिम सम्पन्न भएको छ । आमसञ्चार प्राधिकरण मधेश प्रदेशको आयोजना तथा नेपाल पत्रकार महासङ्घ सप्तरीको समन्वयमा बुधबार तालिम सम्पन्न गरिएको हो ।

पाँच दर्जन भन्दा बढी पत्रकार सहभागी उक्त तालिमको उद्घाटन सत्रमा वक्ताहरूले एआई प्रविधिले नयाँ अवसर निर्माण गरेको भए पनि यसको अनियन्त्रित प्रयोगले चुनौती बढाएको उल्लेख गर्दै सावधानी र जिम्मेवार उपयोगको आवश्यकता औँल्याए ।

आमसञ्चार प्राधिकरण मधेश प्रदेशका अध्यक्ष जितेन्द्र खड्गाको अध्यक्षतामा सम्पन्न उद्घाटन समारोहमा प्राधिकरणका पूर्वअध्यक्ष श्यामसुन्दर यादव, नेपाल पत्रकार महासङ्घ सप्तरीका पूर्वअध्यक्ष वैद्यनाथ झा, मुरलीप्रसाद यादव, व्यासशङ्कर उपाध्याय, धिरेन्द्र प्रसाद साह, वरिष्ठ पत्रकार अनिल अनल तथा महासङ्घ सप्तरीका उपाध्यक्ष रामनारायण विश्वासलगायतले शुभकामना मन्तव्य व्यक्त गरेका थिए ।

कार्यक्रम आमसञ्चार प्राधिकरण मधेश प्रदेशकी प्रमुख प्रशासकीय अधिकृत उपसचिव रन्जीता साहले सञ्चालन गरेका थिइन् । स्वागत मन्तव्य प्राधिकरणका सदस्य नवीन कुमार गुप्ताले प्रस्तुत गरेका थिए ।

तालिममा प्रशिक्षक जीवन भण्डारी र प्रकाश मैनालीले पत्रकारहरूलाई एआईको प्रयोगशीलता, तथ्य–जाँच, सामग्री सुरक्षा, जोखिम व्यवस्थापन तथा व्यावसायिक सावधानीका उपाय सम्बन्धी प्रशिक्षण प्रदान गरेका थिए ।