राजस्व कार्यालय माग गर्दै सप्तरीमा धर्नादेखि जिल्लाभर कार्यालय बन्दसम्मका कार्यक्रम घोषणा

राजविराज । आन्तरिक राजश्व कार्यालय स्थापना गर्न सरकारमाथि दबाब बढाउने उद्देश्यले आन्तरिक राजश्व कार्यालय स्थापना संघर्ष समिति सप्तरीले चरणबद्ध आन्दोलनका कार्यक्रम सार्वजनिक गरेको छ ।

समितिले शनिबार नेपाल पत्रकार महासंघ सप्तरीको कार्यालयमा पत्रकार सम्मेलन गर्दै आन्दोलनका कार्यक्रम सार्वजनिक गरेको हो ।

संघर्ष समितिका संयोजक मोहनकुमार यादवले सरकारी उदासीनताविरुद्ध बाध्य भएर आन्दोलनको बाटो रोज्नुपरेको बताए । उनका अनुसार मंसिर २१ गते आइतबार बिहान ११ बजेदेखि दिउँसो १ बजेसम्म जिल्ला प्रशासन कार्यालय अगाडि दुई घण्टा धर्ना कार्यक्रम आयोजना गरिनेछ ।

त्यसैगरी आन्दोलनलाई थप प्रभावकारी बनाउँदै मंसिर २२ गते धर्ना कार्यक्रमको समय थप गर्दै बिहान ११ बजेदेखि दिउँसो २ बजेसम्म निरन्तरता दिने निर्णय गरिएको उनले जानकारी दिए । आन्दोलनको तेस्रो चरणमा मंसिर २३ गते सप्तरीका सबै नगरपालिका तथा गाउँपालिका अन्तर्गतका वडा कार्यालयसहित जिल्लाका सम्पूर्ण सरकारी कार्यालय बन्द गराउने घोषणा समेत गरिएको छ ।

संघर्ष समितिले आन्तरिक राजस्व कार्यालय स्थापना जिल्लाको आर्थिक सुधारका लागि अपरिहार्य रहेको बताउँदै, राजस्व कार्यालय स्थापना नगरी करदाता सेवा कार्यालय हटाउने कुनै पनि प्रयास करदातामाथिको सीधा ज्यादती ठहरिने चेतावनी दिएको छ । समितिले स्पष्ट रुपमा जनाएको छ- राजस्व कार्यालय स्थापना नगरिएसम्म  करदाता सेवा कार्यालय हटाउने कुनै कदम सह्य हुने छैन, त्यसविरुद्ध कडा आन्दोलन सुरू गरिनेछ । माग पूरा नभएसम्म आन्दोलन नरोकिने संकेत दिएको छ ।