स्ववियु अध्यक्षमाथि एकल निर्णय र नक्कली हस्ताक्षरको आरोप, कक्षमा तालाबन्दी

राजविराज । स्वतन्त्र विद्यार्थी युनियन (स्ववियु) महेन्द्र विन्देश्वरी बहुमुखी क्याम्पस, राजविराजमा आर्थिक अपारदर्शिता र विधानविपरीत गतिविधि भएको आरोपसहित विवाद चुलिएको छ ।

स्ववियु अध्यक्षले सचिव तथा सदस्यहरूलाई कुनै जानकारी नदिई एकल निर्णयका आधारमा स्ववियु खाता सञ्चालनसम्बन्धी प्रक्रिया अघि बढाएको भन्दै अन्य पदाधिकारी हरुले गम्भीर आपत्ति जनाएका छन् ।

आरोप अनुसार स्ववियु अध्यक्षले खाता सञ्चालनका क्रममा कृते (नक्कली) हस्ताक्षर प्रयोग गरेको आशंका समेत गरिएको छ, जुन प्रचलित कानुन, नियम तथा स्ववियु विधानको ठाडो उल्लङ्घन भएको दाबी गरिएको छ ।

यस विषयमा पटक–पटक बैठकको निर्णय अभिलेख (माइनुटिङ) माग गर्दा पनि अध्यक्षले आलटाल गर्दै समय लम्ब्याएको आरोप लगाइएको छ । यस किसिमको गैरजिम्मेवार र अपारदर्शी व्यवहारले स्ववियु भित्र गम्भीर आर्थिक अनियमितता भएको आशंका थप बलियो बनेको सचिव मुकेश कुमार साहको भनाइ छ ।

स्ववियु अध्यक्ष तथा कोषाध्यक्षबाट हालसम्मको सम्पूर्ण आम्दानी–खर्चको विवरण सार्वजनिक गर्न, खाता सञ्चालनसम्बन्धी सबै कागजात उपलब्ध गराउन तथा दोषी उपर कानुनअनुसार कडा कारबाहीको माग गर्दै विद्यार्थी प्रतिनिधिहरूले स्ववियु कक्षमा तालाबन्दी गरेका छन् ।
घटनाको निष्पक्ष छानबिन गरी दोषीमाथि कानुनी कारबाही गर्न र स्ववियु भित्र पारदर्शिता, जवाफदेहिता तथा विधिको शासन कायम गर्न सम्बन्धित निकायसँग उनीहरूले जोडदार माग गरेका छन् ।

यता हस्ताक्षर किर्ते गरी खाता सञ्चालन गरिएको भन्ने आरोप असत्य भएको दाबी स्ववियु अध्यक्ष रञ्जित यादवले गरेका छन् ।