रजत महोत्सवको उत्साह सप्तरीमा, सशस्त्र प्रहरीले मनायो २५औँ स्थापना दिवस

राजबिराज । २५औँ सशस्त्र प्रहरी दिवस २०८२ (रजत महोत्सव) को अवसरमा सशस्त्र प्रहरी बल, नेपाल नं. ६ गण हेडक्वाटर सप्तरीले विशेष कार्यक्रमको आयोजना गरी दिवस मनाएको छ ।

शुक्रबार विष्णुपुर गाउँपालिका–६ स्थित गोरगमा रहेको गण हेडक्वाटर परिसरमा आयोजित रजत महोत्सव समारोहमा वक्तृत्वकला प्रतियोगितामा उत्कृष्ट प्रदर्शन गर्ने छात्र–छात्राहरूलाई सम्मान गरिएको थियो। साथै, सप्तरीका प्रमुख जिल्ला अधिकारी टुवराज पोखरेलले गण परिसरमा वृक्षरोपण गर्दै वातावरण संरक्षणप्रति प्रतिबद्धता व्यक्त गर्नुभयो ।

यस अवसरमा २५ वर्षे सेवा अवधि पूरा गरेका बहालवाला सशस्त्र प्रहरी कर्मचारीहरूलाई २५ वर्षे सेवा ब्याज प्रदान गरिएको सशस्त्र प्रहरी बल, नेपाल नं. ६ गणका प्रहरी उपरीक्षक रोशन बुढाथोकीले जानकारी दिनुभयो ।

रजत महोत्सवको अवसरमा सशस्त्र प्रहरी बल, नेपालले देशभरका विभिन्न गण तथा इकाइहरूमा सामाजिक, सचेतनामूलक तथा व्यावसायिक कार्यक्रमहरू सञ्चालन गरेको छ । पूर्व–पश्चिम सीमावर्ती क्षेत्रका नागरिक, स्थानीय तह तथा सरोकारवाला निकायहरूसँग आपसी जनसम्पर्क, विश्वास र सहकार्य अभिवृद्धि गर्ने उद्देश्यले झण्डा मार्च कार्यक्रमसमेत आयोजना गरिएको थियो ।

कार्यक्रममा सहायक प्रमुख जिल्ला अधिकारी नरेश कुमार यादव, मधेश प्रदेश प्रहरी तालिम केन्द्र राजबिराजका वरिष्ठ प्रहरी उपरीक्षक भिमबहादुर दाहाल, सप्तरी प्रहरी प्रमुख गौतम कुमार केसी, नेपाल पत्रकार महासंघ सप्तरीका अध्यक्ष श्रवण कुमार देव, उपाध्यक्ष रामनारायण विश्वासलगायत स्थानीय समाजसेवी तथा सञ्चारकर्मीहरूको उपस्थिति रहेको थियो ।

यसैगरी प्रहरी दिवसको अवसरमा मुलुकभरका विभिन्न गणहरूमा झण्डा मार्च, अन्तरक्रिया तथा गोष्ठी, निःशुल्क स्वास्थ्य शिविर, रक्तदान कार्यक्रम, शिलालेख अनावरण, खाद्यान्न तथा फलफूल वितरण, सचेतनामूलक सडक नाटक, ब्यानर तथा होर्डिङ बोर्ड स्थापना, क्विक इम्प्याक्ट प्रोजेक्ट, जनचेतनामूलक कक्षा, सरसफाइ अभियान तथा मैत्रीपूर्ण खेलकुद प्रतियोगितालगायत विविध कार्यक्रमहरू सञ्चालन गरिएको सशस्त्र प्रहरीले जनाएको छ ।