चन्दन यादब 
राजविराज । जनमत पार्टीले देशको राजनीतिक निकास र दिगो विकासका लागि नयाँ गणतन्त्र र प्रदेशको पूर्ण स्वायत्तता अपरिहार्य रहेको दाबी गरेको छ ।
आगामी निर्वाचनलाई लक्षित गर्दै पार्टीले सार्वजनिक गरेको घोषणापत्रमार्फत संघ, प्रदेश र स्थानीय तहमा विद्यमान संरचनागत समस्याको समाधानका लागि स्पष्ट खाका प्रस्तुत गरेको जनाएको छ ।
शनिबार राजविराजस्थित नेपाल पत्रकार महासंघ, सप्तरी शाखामा आयोजित पत्रकार सम्मेलनमार्फत जनमत पार्टीका केन्द्रीय अध्यक्ष डा. सिके राउतले घोषणापत्र सार्वजनिक गरेका हुन् ।
घोषणापत्रमा प्रत्यक्ष निर्वाचित कार्यकारी राष्ट्रपतिको व्यवस्था, निर्वाचन प्रणालीमा सुधार तथा न्यायपालिका र संवैधानिक निकायलाई राजनीतिक हस्तक्षेपबाट मुक्त गर्ने प्रतिबद्धता उल्लेख गरिएको छ ।
साथै संसदलाई दबाब र स्वार्थ समूहको प्रभावबाट मुक्त राख्दै जनताको सर्वोच्चता स्थापित गर्ने लक्ष्य लिइएको छ ।
भ्रष्टाचार, अनियमितता र दण्डहीनता अन्त्यका लागि विशेष ट्राइब्युनल गठन गर्ने, नियुक्ति तथा ठेक्कापट्टामा ‘कन्फ्लिक्ट अफ इन्ट्रेस्ट’ अन्त्य गर्ने र उत्पादनमुखी आर्थिक नीति अवलम्बन गर्दै रोजगारी सिर्जना गर्ने घोषणा पनि घोषणापत्रमा गरिएको छ ।
प्रदेशको पूर्ण स्वायत्तताका सन्दर्भमा जनमत पार्टीले मधेशलगायत सबै प्रदेशलाई शिक्षा, स्वास्थ्य, कृषि, उद्योग, साधन–स्रोत र प्रशासनिक अधिकार पूर्ण रूपमा हस्तान्तरण गर्नुपर्ने धारणा अघि सारेको छ ।
प्रदेश मातहत कर्मचारी व्यवस्था, स्थानीय भाषामै सेवा प्रवाह, सुरक्षा निकायमा प्रदेशको अधिकार तथा प्रशासनिक संरचना सुदृढ गर्ने विषय पनि घोषणापत्रमा समेटिएका छन् ।
तराई–मधेशको जनसंख्या र सांस्कृतिक एकरूपताको आधारमा निर्वाचन क्षेत्र पुनर्निर्धारण, सीमांकनसम्बन्धी विगतका सहमति कार्यान्वयन तथा समावेशी समानुपातिक प्रतिनिधित्व सुनिश्चित गर्ने प्रतिबद्धता पनि घोषणापत्रमा उल्लेख गरिएको छ ।
जनमत पार्टीले किसानका समस्या समाधान, कृषि उत्पादनको उचित मूल्य सुनिश्चित गर्ने, उद्योग–धन्दा विस्तारमार्फत युवालाई स्वदेशमै रोजगारी प्रदान गर्ने तथा वैदेशिक रोजगारीमा रहेका नागरिकको हक–हित संरक्षण र स्वदेश फर्किएपछि पुनःस्थापनाका कार्यक्रम अघि बढाउने जनाएको छ ।
यी सबै कार्यक्रम कार्यान्वयनका लागि आवश्यक परे संविधान संशोधन गर्दै नेपाललाई मधेश, पहाड र हिमालबीच साझा, समावेशी र समृद्ध राज्यका रूपमा स्थापित गरिने पार्टीको दाबी छ ।
पत्रकार सम्मेलनमा मधेश प्रदेश सरकारका अर्थ मन्त्री महेश यादव, प्रेस जनमतका केन्द्रीय अध्यक्ष अवधेश झा लगायत सञ्चारकर्मीहरूको उपस्थिति रहेको थियो ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |